د فرخندې پر قتل د تورنو کسانو د محکمې دوېمه علني غونډه نن (۲۰۱۵کال، د مې ۳مه) په پلازمېنه کابل کې ترسره شوه.
د محکمې په دې غونډه کې ۴۹ تنه تورن چې له دې ډلې څخه ۱۹ امنیتي کسان چې د پېښې په سیمه کې موجود و هم حاضر شوي وو.
د محکمې د یکشنبې ورځې په غونډه کې د کورنیو چارو وزارت د جنايي جرمونو د څېړنو رییس جنرال ظاهر ظاهر، د کابل امنیه قومندان عبدالرحمان رحیمي، د کورنیو چارو وزارت امنیتي مرستیال، د امنیه قومندانۍ د مخابرې امر، د دوېمې حوزې د مخابرې مسول او دوه نور امنیتي مسولین د فرخندې د وژنې د دوسیې په تړاو د محکمې په غونډه کې موجود و.
په نننۍ غونډه کې یو افغان نژاد عربي هم په یاده قضیه کې ښکېل شو.
دغه کس چې عبدالوهاب نومیږي، د پېښې په ځای کې موجود و د دې له پاره چې خلک ورته کوم زیان و نه رسوي د امنیتي ځواکونو له خوا له سیمې نه لرې کړی شوی و او له یوه وخت وروسته د امنیتي ځواکونو له لورې بېرته و نیول شو.
عبدالوهاب وايي، چې د افغانستان اوسېدونکی دی خو نه شي کولی چې په پښتو او دري خبرې وکړي.
د محکمې قاضي د عبدالوهاب د اسنادو له لیدولو وروسته د نوموړي د اسنادو د لازیاتو څېړنو امر ورکړ.
ویل کیږي چې د پېښې په ورځ د امنیتي ځواکونو ترمنځ د مخابرې له لارې په اړیکو نیولو کې ستونزې رامنځته شوې وه.
د فروتن په نوم د پولیسو یو غړی په دې تور چې په مخابره کې یې پرازیت خپور کړی و محکمې ته راغوښتل شوی و.
د محکمې قاضي په دې اړه هم د لازیاتو څېړنو امر ورکړ.
د محکمې قاضي د کابل ښار د جوماتونو رییس د محکمې سبا ورځې غونډې ته راوغوښت تر څو د ملایانو د تعویذ ورکولو د حق په اړه ځواب ووايی.
د محکمې په نننۍ ناسته کې د ولسي جرګې یو شمېر غړو، مدني فعالانو او د بشرحقونو فعالانو ګډون درلود.
د محکمې تېرې ورځې په غوڼده کې یواځې د ۱۰ تنو تورنو دوسیې و څېړل شوې.
د فرخندې د قتل دمحکمې دريمه غونډه به سبا ( اپریل ۴مه) ترسره شي.
۲۷ کلنه فرخنده له نوي ۹۴کال ۲ ورځې وړاندې د شاه دوشمشېره په سیمې کې د قرانکریم د سوځولو په تور د قهرجنو خلکو له لوري لومړی ووژل شوه او بیا یې جسد ته اور واچول شو.
د فرخندې وژنې په هېواد کې دننه او هېواد بهر زیات غبرګونونه راپارول او اعتراض کوونکو له دولت نه پر قتل د تورنو کسانو د محکمې غوښتنه کوله.
