د ۱۳۹۴لمریز کال د لیندۍ میاشتې په ۳مه نېټه یوه نظامي چورلکه، چې ۱۸ پوځيان يې د مزارشریف ښار نه فاریاب ولایت ته لېږدول په پښتونکوټ ولسوالۍ کې د وسلهوالو طالبانو تر برید لاندې راغله او د الوتکې له پرځېدو وروسته يې پاتې ژوندي کسان له ځانه سره یوړل.
اوس حکومتي چارواکي وايي، چې له دوی څخه يې ۶ تنه ازاد شوي دي.
یاده دې وي، چې دغه چورلکه د دوو نظامي روسي پېلوټانو له خوا لېږدول کېدله.
په فاریاب کې د شاهین ۲۰۹قل اردوي لومړي لوا قوماندان جنتګل کړوخېل سلام وطندار ته وویل، چې خلاص شوي سرتېري د څېړنو له بشپړېدو وروسته به سبا جمعه (نوامبر۲۵مه) ۲۰۹ شاهین قل اردو ته ولېږدول شي.
د راپورونو له مخې، اوسمهال دوی د فاریاب ولایت په ملي امنیت ریاست کې دي.
کړوخېل وايي، چې وسلهوالو طالبانو دوه روسي پېلوټان له ځان سره قطر ته بېولي او ۶ تنه نور يې تر اوسه نه دي ازاد کړي.
د ۲۰۹ شاهین قل اردو قوماندان وايي، چې د اسیرانو وضعیت ښه دی.
