سره له دې چې مخکې داسې راپورونه خپاره شوي وو چې له مخې یې ټاکل شوې وه د سولې بینالافغاني خبرې اترې نن په قطر پیل شي، خو په افغانستان کې د ملګرو ملتونو استازولي (یوناما) پر خپلې ټویټرپاڼې لیکلي، تېره ورځ یې په دوحه کې له طالب استازیو سره د بینالافغاني خبرو په تړاو خبرې کړي او د افغانانو ترمنځ خبرې به د روانې اوونۍ تر پایه د یاد هېواد په پلازمېنې دوحه کې پیل شي.
یوناما د بینالافغاني خبرو لپاره د باور فضا جوړولو په موخه د تاوتریخوالي کمېدل اړین بللي او ویلي یې دي چې دوی د دغو خبرو ملاتړ کوي.
دا داسې مهال دی چې د دولت د سولې مرکچي پلاوي یوشمېر غړیو پرون وویل چې بینالافغاني خبرې تر یوې نامعلومې مودې ځنډېدلې دي.
په ورته وخت کې د سولې په چارو کې د دولت وزارت ویاندې ناجیې انوري سلاموطندار ته ویلي چې د بینالافغاني خبرواترو د پیل په اړه چې په رسنیو کې پر کومې نېټې بحث شوی، رسمي نېټه نه وه او دوی به له طالبانو سره له همغږۍ وروسته دا نېټه اعلان کړي.
د نوموړې په وینا، د ۴۰۰ طالب بندیانو د خوشې کېدو په اړه چې ولسمشر کوم فرمان صادر کړی، تر اوسه یې ۸۰ هغه خوشې شوي او پاتې طالب بندیان به د تخنیکي او حقوقي پړاوونو له بشپړولو وروسته خوشې شي.
په همدې حال کې د چارو ځینې شنونکي وایي چې بینالافغاني خبرې اترې باید نن پیل شوې وای، خو په وینا یې، ځینې هېوادونه په لوی لاس نه غواړي چې دا خبرې ژر پیل شي.
د چارو شنونکی محبالله شریف وايي، د پردې تر شا داسې څه شته چې په منظم ډول د خبرو د پیلېدو مخنیوی کوي، خو په وینا یې، که ژر وي یا وروسته، خو دا خبرې به هرومرو پیلېږي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم ژرترژره د بینالافغاني خبرواترو د پیل غوښتنه کړې ده.
دغه څرګندونې داسې مهال دي چې فرانسې د ۴ سوو خوشې کېدونکو طالب بندیانو په ډله کې چې طالبان یې د خبرو پیلولو لپاره مهم شرط بولي، د یوشمېر هغو له خوشې کولو سره مخالفت کړی دی.
وسلهوالو طالبانو بیا تېره ورځ په یوې خبرپاڼه کې د ټولو طالب بندیانو نه خوشې کول، د سولې خبرو پیلولو پر وړاندې خنډ جوړول بللي دي.
