کجکی برق بندی ایکینچی بولیمینی قوریش شرطنامهسیگه بوگون امضا چیکیلدی. کیلیشوگه بوگون (شنبه) افغانستان سوو برق وزیرلیگی بیلن تورکیهگه تیگیلیشی قوریلیش بیر شرکت اورتهسیده قول قوییلدی.
مملکت سوو برق وزیرلیگینینگ بلند مرتبهلی رسمیلری کجکی سوو توغانینینگ ایکینچی بولیمی قوریلیشی بیلن بو توغانیده کمیده بیر میلیارد متر مکعب سوو ییغیلهدی دیگنلر. شونینگدیک بو سوو توغانی آرقهلی یوزمینگ جریب هکتار ییر سوولنتیریلیشی رسمیلر آرقهلی تیلگه آلینگن.
شرطنامهگه قول قوییلیشی مناسبتی بیلن بوگون جمهور رییسلیک سراییده اوتکزیلگن ییغینده سوزلهگن سوو برق وزیری علی احمد عثمانینینگ بیلدیریشیچه، کجکی سوو توغانی قوریلیشی بیلن امنیت، منطقهوی برقرارلیک، ولایتی ترقیات و خلق رضایتی میزانی اوزگریشی ممکن.
جناب عثمانی، افغانستان انرژی و قوت ساحهسیده اوز ایاغیده توریش اوچون 4-5 میلیارد اقش دالریگه احتیاجی بارلیگینی ملعوم قیلگن.
«77» تورکی شرکتنینگ باشلیغی سلیمانسلیونینگ سوزلریگه کوره، کجکی سوو توغانینینگ ایکینچی بولیمی قوریلیشی بیلن بوتوغانده ایشلب چیقاریله دیگن برقنینگ کوچی ایکّی برابرگه آشهدی.
شونینگدیک حکومتنینگ مسووللری هلمند و قندهار اهالیسیدن کجکی بندی ایکینچی بولیمینینگ قوریلیش جریانیده دولتگه همکارلیک قیلیشلرینی سورهگنلر.
کجکی برق بندی قوریلیش ایشینینگ ایکینچی بولیمی اوز پایانیگه ییتیشیشی بیلن اوشبو بند 151 میگاوات برق ایشلب چیقاریش دن علاوه 2 میلیارد 34 میلیون متر معکب سوونی سقلیدی.
