طالبان گروهی کوپ ییللردن بویان افغانستان حکومتی و اوشبو مملکتده جایلشگن چیتایللیک کوچلرنی برابریده اوروشهدی. سونگی آیلرده مذکور گروه بیلن سوزلشوولر اوتکزیلیشی توغریسیده سعی و حرکتلر شدتلنگن، بیراق طالبان گروهی تشکیل ایتیلگنیدن بویان افغانستان حکومتی بیلن مذاکره قیلیش خصوصیده اونچهلیک علاقه کورستمهگن. مذکور گروه نینگ جوده جنجللی و بحثلی موضوعلردن بیری اولرنینگ مالی قیناغی بولگن؛ بیرقطارلرنینگ ایشانچی گه کوره، طالبان گروهی منطقه استخباراتی تشکیلاتلری تامانیدن حمایه قیلینیب و جهازلنهدی و باشقه بیرقطارلر بویوک مملکتلرنی آیاغی نی اورته گه تارتهدی. بو آرهده گمرکلر و سوداگرلیک یوللر کبی مالی قیناقلر کورینهدی و بو یوللردن طالبان گروهی تامانیدن قولگه کیریتیلهدیگن درآمدنی دقیق رقمی آچیقلنمهگن؛ سلاموطندار میدیا ترماغی بو تدقیقاتده افغانستان بویلب طالبان گروهی تامانیدن قولگه کیریتیلهدیگن درآمدنی دقیق رقمی بیلگیلنیشی توغریسیده سعی و حرکت قیلگن؛ بو درآمد طالبان گروهی تامانیدن گمرکلر، عشر و ذکات و باشقه محلی قیناقلردن قولگه کیریتیلهدی.
سلاموطندار میدیا ترماغی آرقهلی قولگه کیریتیلگن معلومات اساسیده، طالبان گروهی نینگ گمرکلر، عشر و ذکات و محلی قیناقلردن قولگه کیریتهدیگن ییللیک درآمدی 22 میلیارد افغانی دن آرتیق رقم گه (22.761.600.000) ییتیشهدی؛ بو رقم افغانستان خوفسیزلیک کوچلری نینگ مالی خرجتینی نیچه برابرینی کورستهدی.
.jpg)
- گمرکلر
فاریاب، غزنی، فراه، نیمروز، خوست و بغلان
طالبان گروهی میمنه-مزارشریف یولی گمرکیده سوداگرلیک توارلر یوکلنگن هر بیر موتردن «7000 دن باشلب 35000 افغانی گچه» مالیه آلهدی. فاریاب ولایت کینگشی اورین باسری صبغتالله سیلاب نینگ ایتیشیچه، طالبان گروهی هر آی یالغیز اوشبو گمرکدن کمیده «12.500.000» افغانی درآمد قولگه کیریتهدی. شونینگدیک، سلاموطندارگه صحبت بیرگن فاریاب حاکمی سوزلاوچیسی جاوید بیدارنینگ ایتیشیچه، طالبان گروهی باسقینلر باعث چیتایللیک مالی قیناقلرینی قولدن بیرگن و شو یوزهدن مالی خرجتلرینی مملکت قتناو یوللرینی گمرکلریدن تأمین قیلهدی.
طالبان گروهی نینگ غزنی تومنلرینی قیناو یوللری و اوشبو ولایتدن اوتگن قتناو یوللرده گمرکی بار و بو یولدن آیلیک درآمدی «1.200.000.000» افغانی گه ییتیشهدی.
غزنی ولایت کینگشی باشلیغی نصیراحمد فقیری نینگ ایتیشیچه، غزنی ده طالبان گروهی نینگ درآمدیدن کوپینچهسی کابل-قندهار و غزنی-پکتیکا قتناو یوللری و شونینگدیک، بامیان و دایکندی ولایتلری نینگ بیش تومنی گه قتناو یول بولگن قیاق درهسیدن قولگه کیریتیلهدی.
طالبان گروهی نینگ فراه ولایتیده شیخ ابونصر فراهی گمرکی و اوشبو ولایتده فراه-قندهار قتناو یولیدن قولگه کیریتهدیگن آیلیک درآمدی «300 میلیون» افغانی گه ییتیشهدی. سلاموطندارگه صحبت بیرگن فراه ولایت کینگشی اورین باسری شاهمحمود نعمتی نینگ ایتیشیچه، طالبان هر بیر موتردن سوداگرلیک توارلرنی نظرگه آلیب 50 دن باشلب 500 مینگ افغانی گچه مالیه آلهدی و کوندهلیک رقمی کمیده 10 میلیون افغانی بولهدی.
.jpg)
نیمروز ولایتیده طالبان گروهی نینگ گمرکی دلارام تومنیده جایلشگن و بو گمرک درآمدی هر آی «78 میلیون» افغانی گه ییتیشهدی. آتلری فاش ایتیلیشینی ایستمهگن هیداوچیلردن بیرقطاری نینگ سلاموطندارگه ایتیشیچه، طالبان گروهی دلارام قتناو یولیده گمرک ایجاد قیلیب سوداگرلیک توار یوکلنگن هر بیر موتردن 2500 دن باشلب 40 مینگ افغانی گچه مالیه آلهدی. شونینگدیک، سلاموطندارگه صحبت بیرگن نیمروز ولایتی نینگ صناعت و سوداگرلیک اتاقلری باشلیغی عبیدالله نورزایی، اوشبو قتناو یولده طالبان گروهی تامانیدن گمرک ایجاد ایتیلگنینی تصدیقلب ایتیشیچه، افغانستانده طالبان گروهی تامانیدن گمرک ایجاد ایتیلیشی ینگی بیر گپ ایمس دیر و طالبان گروهی مملکت قتناو یوللریدن کوپینچهسیده گمرک ایجاد قیلگن. جناب نورزایی گه کوره، طالبان هر بیر یوک تاشیووچی موتردن 20 دن باشلب 30 مینگ افغانی گچه مالیه آلهدی.
خوست ولایتیده طالبان گمرکی سوداگرلیک توار یوکلنگن هر بیر موتردن 20 دن باشلب 200 مینگ افغانی گچه مالیه قولگه کیریتهدی. بو گزارشده آتلری فاش ایتیلیشینی ایستمهگن خوست محلی رسمیلری نینگ ایشانچی گه کوره، اوشبو ولایتده طالبان گروهی نینگ آیلیک درآمدی کمیده «30 میلیون» افغانی دیر. اولرگه کوره، طالبان عشر و ذکات گه علاوه خوست ولایتی نینگ قلندر، موسیخیل و دومنده تومنلریده هر بیر عایلهوی و قومی جنجلنی حل قیلگنده 500 مینگ پاکستانلیک کلدار قولگه کیریتهدی.
طالبان گروهی بغلان ولایتیده ایجاد قیلگن گمرک دن نفت تاشیووچی هر بیر موتردن 10 دن باشلب 20 مینگ افغانی گچه پول آلهدی. سلاموطندارگه صحبت بیرگن بغلان ولایت کینگشی باشلیغی محمدصفدر محسنی، بغلان قتناو یولیده طالبان تامانیدن گمرک ایجاد قیلینگنینی تصدیقلیدی و بو گمرک دن مذکور گروه نینگ آیلیک درآمدی 24 میلیون افغانی دن کوپراق بولهدی.
.jpg)
طالبان گمرکی آرقهلی سوداگرلیک توارلردن آلینهدیگن مالیه جوده هم توزگون دیر. مذکور گروه گمرکلریده بیر رویخط اساسیده، تورلی توارلردن بیللی بیر بها بیلن مالیه آلهدی. توارلرنی مالیهسی موترلرنی آغیرلیگی گه نسبتن فرق قیلهدی؛ مثال صورتده، طالبان گمرکی ییگولیک ماده تاشیدیگن آلتی تایرلی موتردن 4 مینگ افغانی، 10 تایرلی دن 8 مینگ افغانی و 16 تایرلی دن 12 مینگ افغانی آلهدی. طالبان گمرکی تامانیدن 10، 12 و 16 تایرلی پرزهجات آرتیلگن و یوک تاشیووچی موترلردن آلینهدیگن مالیه تیزیم شکلده 8500، 17000 و 25500 افغانی بولهدی. شونینگدیک، دارو تاشیووچی موترلردن آلینهدیگن مالیه رقمی 11، 22 و 33 مینگ افغانی گه ییتیشهدی.
بو مبلغ مرمر تاش یوکلنگن موترلردن 8، 16 و 24 مینگ افغانی دیر. کییم دن 35، 7 و 14 مینگ افغانی، چهارتراش آغاچ دن 5، 10 و 15 مینگ افغانی و سگرت دن 8500، 17 و 25500 افغانی بولهدی.
اورته شکلده کوندهلیک شمال، جنوب، شرق و غرب حوزهسی قتناو یوللریدن هر کون 30 دن آرتیق یوک تاشیووچی باریب کیلهدی و بو رقم کابل حوزهسی اوچون 200 دن 300 موترگه ییتیشهدی.
سلاموطندار میدیا ترماغی نینگ خبرچیلری طالبان گروهی نینگ گمرکی دن قیزیق حکایهلر قیلهدی. اولرنینگ ایتیشیچه، بو گمرکلرده تیزیم بیرینچی موضوع بولگن و خلق آچیق پیشانه و خوشلیک بیلن سوداگرلیک توارلریدن مالیه توللیدی و عین حالده، بو وضعیت دولتی گمرکلرده عکسینچه دیر.
.jpg)
گمرکی یوق ولایتلر
غور ولایتیده طالبلرنینگ رسمی شکلده گمرکی یوق دیر، بیراق آتی فاش ایتیلیشی نی ایستمهگن قطار هیداوچیلرنینگ ایتیشلریچه، طالبلر نیچه ییلدن بویان مذکور ولایت نینگ قتناو یوللریده چک پاینت قوریب هر بیر یوک تاشووچی موتردن 2 الی 7 مینگ افغانی پول آلهدیلر. اوشبو هیداوچیلرگه کوره، کونده 50 الی 100 موتر بیر قتناو یولدن اوتیب-قیتهدی. بوندی وضعیت گه غور ولایتیده مذکور گروه نینگ درآمدی «8.400.000» مینگ افغانی گه ییتیشهدی. غور حاکمی سوزلاوچیسی عبدالحی خطیبی اوشبو خبرنی تن آلیب ایتیشیچه، طالبلرنینگ نظارتی گه بولگن منطقهلرده کوپینچه پول توپلنهدی.
شونینگدیک طالبلر بادغیس ولایتیده هیداوچیلردن پول آلهدی و یالغیز بیر آیده اوشبو ولایتده طالبان 45 میلیون افغانی درآمد قیلهدی. قطار هیداوچیلرنینگ ایتیشلریچه، طالبلرنینگ بادغیس-هرات قتناو یولی نینگ بند سبزک منطقهسیده چک پاینتی بار و کونده، هر موتردن 500 افغانی الی 12000 افغانی پول آلهدیلر. سلاموطندارگه صحبت بیرگن بادغیس ولایتی کینگشی اعضاسی ناصر نظری نینگ ایتیشیچه، طالبلر اوشبو تومنده هیداوچیلردن پول آلیش یانیده، مذکور قتناو یول دولت ایشلاوچیلری و امنیتی کوچلر اوچون خوفلی یول حسابلنهدی.
تخار ولایتیده طالبلرنینگ درآمدی منبعسی، سوداگرلر و اهالیدن عشروزکات و مالیه توپلش دیر. آتی فاش ایتیلیشی نی ایستمهگن محلی منبعلردن قطاری نینگ سلاموطندارگه ایتیشیچه، نفت سوداگرلری هر آیده هر بیر نفت تاشووچی تانکردن 20 مینگ افغانی طالبلرگه تولهیدیلر و هر بیر سوداگرنینگ کمیده 10 الی 20 نفت تاشووچی تانکری بار. اولرگه کوره، طالبلرنینگ سوداگرلردن عشر و زکات توپلشدن در آمدلری هر آیده 173 میلیون افغانیدن آرتیققه ییتیشهدی.
شونینگدیک اوشبو گروه نینگ سرپل ولایتیده رسمی گمرکی یوق دیر. بیراق یالغیز مهییز سوداگرلری هر آیده 9 میلیون افغانی مذکور گروه گه تولهیدیلر. سرپل ولایتی سانچارک تومنی ولسوالی نقیبالله دقیق نینگ سلاموطندارگه ایتیشیچه، طالبلر مذکور تومندهگی تِیبر و تغایخواجه بازاری نی نظارت گه آلیش بیلن کونده یالغیز مهییز محصولاتیدن 300 مینگ افغانی درآمد قیلهدیلر.
شونینگدیک طالبلرنینگ سرپل ولایتی یانیده جوزجان ولایتیده هم گمرکی یوق، بیراق ییر اجارهسی، عشروزکات، اوغیرلاوچیلیک، قورال ساتیشی و مخدره ماده قاچاقیدن کوپ پول قولگه کیلتیرهدیلر؛ اوشبو پول هر آیده کمیده 6 میلیون افغانی گه ییتیشهدی. قولگه کیلگن معلوماتلر اساسیده، طالبان جوزجان ولایتی نینگ منگجیک، خماب و باشقه قطار تومنلریدن هر آیده کمیده 100 الی 200 مینگ افغانی زوردن اهالیدن توپلهیدیلر.
سلاموطندارگه صحبت بیرگن جوزجان ولایتی منگجیک تومنی ولسوالی مطیعالله احسان نینگ ایتیشیچه، طالبلر اوشبو تومندهگی دولتی ییرلرنی اهالی گه اجاره گه بیرگن و شو درکدن هر آیده هر بیر قیشلاقدن 70 الی 80 مینگ افغانی پول توپلهیدیلر کیم اوشبو پول ایسلنگن 100 الی 200 مینگ افغانی گه شامل بولهدی. جوزجان ولایتی نینگ فیضآباد تومنی ولسوالی الفشاه عطایی نینگ ایتیشیچه، شونینگدیک سوداگرلردن باج آلیش طالبلرنینگ قولگه کیلتیرهدیگن عایدلریدن بیر بولیمی نی تشکیل بیرهدی.
قندوز ولایتیده طالبان گروهینینگ رسمی گمرکی یوق، بیراق پکتیا ولایتی کبی باشقه قطار ولایتلرده دولتی گمرکلردن اوز سهملرینی آلهدی و اوشبو رقم آیده «4.500.000» افغانیگه ییتیشهدی. شیرخان بندری آرقهلی تاجیکستان و مرکزی آسیا ده سوداگرلیک قیلهدیگن قطار کیشیلرنینگ کیملیگی سیرقالیشنی ایستهب سلاموطندارگه ایتیشیچه، نیچه ییلدن بویان طالبان گروهی گمرک توپلش اوچون اوز نمایندهلرینی بو بندرگه تعیین قیلگن. اولرنینگ کوپهیتیریشیچه، طالبان نمایندهلری سوداگرلیک کالا یوکلنگن هر بیر موتردن 2 دن باشلب 3 مینگ افغانیگهقدر مالیه آلهدی.
بامیان، میدانوردک و دایکندی ولایتلری هم طالبان گروهی نینگ درآمدی منبعلریدن دیر. مذکور ولایتلرنینگ قتناو یوللریده طالبان گروهی هر بیر یوک تاشیووچی موتردن 500 دن باشلب 10 مینگ افغانیگهقدر مالیه آلهدی. موترلر هیداوچیلرنینگ ایتیشیچه، اوشبو رقملر هر بیر آیده «3.600.000» افغانیگه ییتیشهدی. بامیان ولایتی کینگش اعضاسی محمدحسن اسدی نینگ ایتیشیچه، جلریز و دره غوربند تومنی نینگ 8 کیلومتر جادهسی طالبان کنترولیگه دیر و موتر هیداوچیلریدن ایرکین شکلده مالیه آلهدی.
طالبان گروهینینگ پکتیا ولایتیده گمرکی یوق، بیراق سهملرینی دولتی گمرکلردن قولگه کیلتیرهدی. قطار سوداگرلرنینگ کیملیگی سیرقالیشنی ایستهب سلاموطندارگه ایتیشیچه، طالبان گروهی هر بیر موتردن 5 مینگ پاکستانلیک کلدار مالیه آلهدی و طالبان گروهینینگ بو توغریدن قولگه کیلتیرهدیگن درآمدلری آیده «2.250.000» افغانیگه ییتیشهدی. پکتیا ولایتی کینگش اعضاسی نینگ سلاموطندارگه ایتیشیچه، طالبان گروهی موترلردن مالیه آلگنی چکهسیده مارکیتلر مالکلریدن هم پول قولگه کیلتیرهدی.
.jpg)
پکتیا ولایتی کینگش اعضاسی محمد رحمان قادرینینگ ایتیشیچه، طالبان گروهی گاهگاهی قتناو یوللرده حضور تاپیب موترلرنینگ گمرکی حجتلرینی تیکشیرهدی.
سمنگان ولایتیده طالبان گروهی عشر و زکات توپلهیشی چکهسیده، اوزلریگه تجهیزات تهیه قیلیش اوچون اوشبو ولایت یوک تاشیووچی موترنینگ هیداوچیلریدن پول آلهدی. بو گروه نینگ بو توغریده قولگه کیلتیرهدیگن درآمدلری آیده 49 مینگ افغانیگه ییتیشهدی. مذکور ولایت هیداوچیلریدن بیرقطاری نینگ ایتیشیچه، طالبان گروهی عشر و زکات توپلهیشی چکهسیده، هر بیر هیداوچیدن آیده 7 مینگ افغانی پول آلهدی.
هلمند ولایتی طالبان گروهینی تمویل قیلهدیگه باشقه بیر منبع دیر. اوشبو ولایتده طالبان گروهی تومنلردن لشکرگاه شهریده کیرهدیگن هر بیر کیچیک موتردن 30 دن باشلب 50 افغانیگهقدر مالیه آلهدی و بو رقم ییلده 25 میلیون افغانیگه ییتیشهدی.
هلمند محلی منبعلریدن بیرقطاری نینگ کیملیگی سیرقالیشنی ایستهب سلاموطندارگه ایتیشیچه، حکومت نینگ یالغیز نادعلی، نهرسراج و ناوه تومنلریده حضوری بار و باشقه تومنلر طابان کنترولیگه دیر. اولرنینگ ایتیشیچه، هلمندلیک هیداوچیلرنینگ بیر تومن دن باشقه بیر تومنگه بارهدیگن چاغده طالبان برگهلرینی اوزلری بیلن آلیب باریشی کیرهک.
طالبان گروهی گمرکلر و عشر و ذکات توپلشدن قولگه کیلتیرهدیگن درآمدلری چکهسیده، لغمان، ننگرهار، کنر، زابل و نورستان ولایتلریده اورمانلرنی کیسیب قوشنی مملکتلرده قاچاق قیلیش، مخدره مادهلرنی قاچاقی، سوداگرلردن باج آلیش، کانلرنی چیقاریب قاچاق قیلیش و قورال قاچاقیدن مالی قیینچیلیکلرینی حل قیلهدیلر. مذکور ولایتلرده محلی مقاملرنینگ محافظهکارلیگی باعث، طالبان گروهی درآمدلرینینگ ارقامی بیللی ایمس.
بدخشان و پنجشیر ولایتلریده طالبان گروهی نینگ هیچقندی گمرکی یوق. سلاموطندار قولیگه توشگن منبعلرگه کوره، اوشبو گروه کاپیسا ولایتینینگ تگاب و نجراب تومنیده فعالیت قیلهدی، بیراق اهالیدن باج آلمی و گمرکلری هم یوق دیر.
طالبان گروهی نینگ سوزلاوچیسی ذبیحالله مجاهد، سلاموطندار بیلن اوتکزگن صحبتیده بو گروه درآمدلری توغریسیده معلومات بیرمهیدی، بیراق درآمدلری قتناو یوللر خوفسیزلیگینی تامین قیلشگه مسوول بولگن اعضالریگه هزینه ایتیلهدی دیدی. جناب مجاهد گه کوره، هرات، قندهار، ننگرهار، قندوز و بلخ ولایتلریده اولرنینگ گمرکی بار و کوپراق درآمدلری هرات، قندهار و ننگرهار ولایتلریدن دیر.
طالبلرنینگ گمرکی نرخی نی رویخطی
