کاپیسادن بولگن ایریم امنیتی منبع‌لر، اوشبو ولایت نینگ تگاب تومنی سقوط گه روپه‌ره بولگنینی ایتگن.
201 سیلاب قول اردو قومندانلیگی دن امنیتی بیر منبع آتی فاش ایتیلیشی‌نی ایستمه‌ی سلام‌وطندارگه ایتیشیچه، تگاب تومنی نینگ جنوبی ده «آخندزاده ها، نوروزخیل، پاینده‌خیل و چنگلی» قیشلاقلریده طالبان گروهی نینگ هجوملری نتیجه‌سیده امنیتی کوچلرنینگ 25-30 پوسته‌سی مذکور گروه نینگ قولی گه سقوط قیلگن.
منبع گه کوره، بو آره‌دن 4 پوسته حربی کوچلری و باشقه‌سی ملی پولیس و مردمی کوچلرگه تیگیشلی بولگن. منبع نینگ کوپه‌یتیریشیچه، اوشبو پوسته‌لرده بولگن کوچلر آرقه گه چیکیلگن و حاضر 201 سیلاب قول اردو قومندانلیگی نینگ آلتینچی کندکی ده جایلشگن‌لر.
اوشبو حربی منبع نینگ اورغولشیچه، تگاب ده دولتی پوسته‌لرنی اوستیگه طالبان گروهی تامانیدن اویوشتیریلگن هجوم ده امنتیی کوچلردن 8 ته‌سی هلاک ایتیلگن و باشقه 12 ته‌سی یره‌لنگن، بیراق طالبان گروهی گه قربانلیک ییتمه‌گن.
عین دمده، کاپیسا ولایت کینگشی باشلیغی محمدحسین سنجنی نینگ ایتیشیچه، شنبه کون، 24- جوزا، تگاب ده امنیتی کوچلرنینگ پوسته‌لری اوستیگه طالبان گروهی تامانیدن اویوشتیریلگن هجوم ده مردمی کوچلردن 4 ته‌سی هلاک ایتیلگن و باشقه 11 ته‌سی یره‌لنگن. اونگه کوره، ایکی تامان آره‌سیده یوز بیرگن آتیشمه‌ده طالبان گروهی نینگ جنگریلریدن 11 ته‌سی هلاک ایتیلیب و باشقه 18 ته‌سی یره‌لنگن.
عین حالده، کاپیسا پولیس قومندانلیگی دن بیر منبع نینگ ایتیشیچه، طالبان گروهی نینگ جنگریلری پوسته‌لرنی نظارت گه آلیب تگاب تومنی نینگ بناسی گه یقینلشگن.
اوشبو منبع گه کوره، اوتگن ایکی کون جریانیده تگاب ده یوز بیرگن آتیشمه جریانیده امنیتی کوچلر و طالبان نینگ قربانلری گه علاوه، 3 تینچ اهالی جان بیرگن و باشقه 9 تینچ اهالی یره‌لنگن.
طالبان گروهی حاضرگه‌قدر بو آتیشمه‌لرنی توغریسیده هیچ نرسه دیمه‌گن.
تگاب کاپیسا ولایتی نینگ ناتینچ تومن‌لریدن بیری سنله‌دی و طالبان گروهی بو تومنده کینگ شکلده فعالیت قیله‌دی.
