افغانستان اوچون بیرلشگن ملتلر تشکیلاتینینگ مخصوص نمایندهسی نیکولاس هیسم 2015- پایانیگچه مملکت اوروش شددتلهنیشینی ایتگن.
بیرلشگن ملتلر تشکیلاتی خوفسیزلیک کینگشیده گزارش بیرگن جناب هیسمگه کوره، افغانستان دنیا جماعهچیلیگینینگ حمیاتیگه احتیاجی بار، چونکه بو مملکتده هنوزهم امنیت و برقرارلیک دییرلی تامین ایتیلمهگن. اونگه کوره، افغانستان خلقی نامعلوم بیر کیلهجک بیلن روپه رهلر. اهالی ملی بیرلیک حکومتینینگ ایشلریدن یورهکلری ساوویب مهاجرتگه یوز کیلتیرگنلر.
افغانستان اوچون بیرلشگن ملتلر تشکیلاتینینگ مخصوص نمایندهسی اهالینینگ برچه امیدلری افغانستان حکومتیگه یاردم بیره دیگن مملکتلردن بولگن، و خارجی یاردملر میزانی کمیشی بیلن اورپا مملکتلریگه مهاجرت قیلیش میزانی آشگن.
جناب هیسم، توقنشوولرده حاضرهم کوپراق تینچ اهالی زیان کورهدی دیگن و بیرلشگن ملتلر تشکیلاتی ادارهسینینگ حساباتیده مذکور تلفات جاری ییلنینگ بیرینچی سکیز آییده کوزگه کورینرلی درجهده آشگن. او، دولت قوراللی مخالفلرینینگ تینچ اهالی تلفاتی اوچون اصلی عامل بولگن لیگنی اظهار قیلگن.
ییغین سونگیده نطق سوزلهگن افغانستان اوچون بیرلشگن ملتلر تشکیلاتینینگ مخصوص نمایندهسی افغانستانلیکلر تینچلیککه ایریشیش اوچون بولگن برنامهلر عملگه آشیریلیشی اوچون سعی و حرکت ایتیلیشی توغریسیده تاکیدلهگن. بوندن اوچ آی آلدین جناب هیسم بیرلشگن ملتلر تشکیلاتیگه بیرگن اوچ آیلیک گزارشده افغانستانده خارجی گروهلر جملهدن داعش گروهی مرکزلری ایجاد ایتیلگن لیگی توغریسیده خواطر بیلدیرگن ایدی.
