اوتگن کونگی افغانستان یشاوچیلری‌نینگ کابلده یولگه قویگن اعتراضلر پولیس کوچلری تامانیدن خشونت‌گه اوزگرییب ۶ کیشی اولیب و ۱۰ یقین کیشی یره‌لنیشیگه جدی ناراضی‌لیکلر بیلدیریلگن.
خلق ارا عفو تشکیلاتی اعلامیه صادر قیلیب اوتگن کونگی کابلده اعتراضچیلرگه قرشی اوق اوزیش عامللرینی محکمه بولیشینی طلب قیلگن. خلق ارا عفو تشکیلاتی‌نینگ ایتیشیچه، امنیتی کوچلر تامانیدن اعتراضچیلرگه اوق اوزیش قانیقرلی ایمس.
شونینگدیک خبرنامه‌ده کیلیشیچه: «کابلده روی بیرگن قانلی حادثه گه قره‌ته یشاوچیلرنینگ اعتراضلریگه قرشی امنیتی کوچلر اوق اوزیب اولرنی اولیمی‌گه سبب بولیشی دولت رسمیلرینی اهالیگه حرمت سیزلیگینی کورسته‌دی.»
بیرلشگن ملت‌لر تشکیلاتی هم یشاوچیلر اعتراضی‌گه قرشی امنیتی کوچلر اوز اوزیشینی قاره‌لگن. بیرلشگن ملت‌لر تشکیلاتی‌نینگ افغانستانده‌گی نماینده‌سی تدامیچی یاماموتونینگ کوپه‌یتیرشیچه: «خشونت کوپلیشی قیینچی‌لیکنی حل قیلمه‌یدی.»
سابق جمهور رییس حامد کرزی هم اعلامیه صادر قیلیب، تظاهرات افغانستان یشاوچیلرینی حقی و امنیتی کوچلر باید اعتراضچی‌لر امنیتی‌نی آلسه دیگن.
افغانستان انسان حقلر ایرکین کمیسیونی هم امنیتی کوچلر تامانیدن اعتراضچی‌لرنی اولدیریش عملینی قاره‌لگن و اونی قانیقرلی عمل ایمس‌لیگینی معلوم قیلگن. کمیسیون رسمیلری، تظاهراتچیلر اوستیگه اوق اوزگنلر تانیلب محکمه بولیشینی طلب قیلگن.
کابل نینگ وزیر محمداکبر خان منطقه‌سیده چهارشنبه کونگی قانلی پارتلش حادثه‌سیده ۸۰ دن آرتیق انسان هلاک و ۴۶۰ دن آشه انسان یره‌دار بولگن ایدی.
بوحادثه گه قره‌ته اونلب کابل یشاوچیلری حکومت نینگ ناکاملیگینی قاره‌لب یوللرگه چیققن ایدیلر، اما بو یشاوچیلر امنیتی کوچلر تامانیدن اوق اوزیش عملی بیلن روپه‌ره بولدیلر.
