کابل شهردارلیگی مسووللرینینگ ایتیشیچه، مملکت بویلب 700 مینگ سیار ساتووچیدن، 500 مینگ تهسی کابلده سیار ساتووچیلیک قیلهدی.
شوندهی بیرحالده، کابل شهردارلیگی، محلی ارگانلر، اجتماعی ایشلر وزیرلیگی و مملکتدهگی بیرلشگن ملتلر تشکیلات ادارهسی اویغورلیکده سیار ساتووچیلر قیینچیلیگینی حل ایتیش خصوصیده حقوقی لایحه تیارلشگه سعی و حرکت قیلماقده.
کابل شهردارلیگی شهری خذمتلر اورین باسری مهندس خوژمن علومینینگ، سهشنبه کون کابلده اوتکزیلگن بیر ییغینده ایتیشیچه، اولر ایکی ییلدن بویان سیار ساتووچیلرنینگ قیینچیلیگینی حل ایتیش خصوصیده حقوقی ریجه تیارلشگه سعی و حرکت قیلیب کیلگن.
جناب علومینینگ ایتیشیچه، سیار ساتووچیلرنینگ کوپینچه عایدی مافیا قولیگه توشهدی. شونینگدیک اونینگ ایتیشیچه، یالغیز پایتختده بولگن پل باغ عمومی، پل خشتی و پل یکپیسهگی منطقهلریدن کمیده 80 مینگ دالر سیار ساتووچیلر زحمتیدن قولگه کیلیب و مافیا کیسهسیگه کیرهدی.
علومینینگ کوپهیتیریشیچه، تورت کیشی منطقهده سیار ساتووچیلرنینگ پولینی توپلهیدی و آخرده ساتووچی 100 افغانی بیلن اوییگه کیتهدی.
شونینگدیک ساتووچیلرنینگ ایتیشیچه، کوپینچه قیینچیلیکلرگه روپهره بولگنلر. اولرنینگ ایتیشیچه، هردایم امنیتی کوچلر، ترافیک و زورهوانکیشیلر تامانیدن اذیت بولهدیلر.
کابل شهری سیار ساتووچیلریدن بیری سردارمحمدنینگ ایتیشیچه، هر هفته ترافیک، ناحیه و حوزه ایشچیلریگه 700 افغانی بیرهدیلر. اونینگ کوپهیتیریشیچه، حاضر مذکور اداره ایشچیلری شهرنینگ ایریم منطقهلریدن پول توپلهیدی، سیار ساتووچیلر پول بیرمهگن صورتده، ایشلریگه دوام بیرهآلمهیدی.
سیار ساتووچیلردن باشقه بیری ذبیحاللهنینگ ایتیشیچه، واسطهسی بار و منطقه پولیسیگه کوپ پول بیرهدیگن کیشیلر گاوجوم منطقهلرده ساتووچیلیک قیلهدی، پولسیز و واسطهسیز کیشیلر منطقهدن چیقاریلهدی.
اوشبو سیار ساتووچیلر، حکومتدن بو توغریده زمینه یرهتیشینی سورهیدی.
شونینگدیک، محلی ارگانلر ادارهسی تخنیکی و پالیسی اورین باسری نادر یما، سیار ساتووچیلرنینگ قیینچیلیگی حل ایتیلیشی خصوصیده لایحه قولگه آلینگنینی تأیید قیلیب ایتیشیچه، سیار ساتووچیلر دکانگه کرایه بیرهآلمهیدی، انه شو سبب سرکلرده سیار شکلده ساتووچیلیک قیلهدی.
گزارشلرگه کوره، حاضر مملکت یشاوچیلریدن کمیده 40 فایزی ایشسیز دیر. ایتیلیشیچه، اوشبو ایشسیزلردن کوپینچهسی دایمی ایش بولمهگنی باعث، سیار شکلده ساتووچیلیک قیلهدیلر.
