افغانستان ملی امنیت ریاستینینگ ایتیشیچه، کابل بوییچه حقانی ترماغی عمومی مسؤولی و باشقه آلتی همراهسی بیلن کابل شهری 9- ناحیهسیگه تیگیشلی هودخیل منطقهسیدن بیر عملیات جریانیده قولگه آلینگن.
ملی امنیت ریاستی تامانیدن ترقهتیلگن خبرنامهده یازیلیشیچه، قولگه آلینگن کیشیلر، هوا شناسلیک خیابانی، کابل هوا قونالغهسی کیریش ایشیگی و هوا قونالغه خیابانیدهگی پارتلش هجوملرنی ریجهلگن ایکن.
ملی امنیت خبرنامهسیده کیلیشیچه، حقانی ترماغینینگ، اوشبو 7 اعضاسی کابلده ینگی هجوم ریجهلش نیتیده بولگن چاغیده، اوتگن کیچه ملی امنیت کوچلری تامانیدن تانیلیب توتقونگه آلینگن.
خبرنامه اساسیده، قولگه آلینگن کیشیلر ایچیده کابل بوییچه حقانی ترماغی عمومی مسؤولی «شاهمحمد اوغلی خالد» ناملی کیشی قوشیمچه حقانی ترماغی تبلیغات عمومی مسؤولی عصمت الله، پارتلاوچی ماده تولدیریلگن موترلرنی سقلشگه مسؤول نورالله و اوشبو ترماق خودکش هجومچیلرینی سقلشگه مسؤول فرهاد شامل بولگن.
شونینگدیک، ملی امنیت تامانیدن ترقهتیلگن ویدیو ده «خالد» حقانی ترماغی بیلن علاقه قوریب، 1389- ییل کابل شهریده اویوشتیریلگن نیچه هجومگه قولی بارلیگینی ذیمهسیگه آلگن. اونینگ ایتیشیچه، 1389- ییل هم ملی امنیت کوچلری تامانیدن قولگه آلینگن؛ بیراق اوندن کیین نیمه اوچون و قندهی بیر شلکده قوییب یوباریلگنی بیللی ایمس.
شونینگدیک، ملی امنیت کوچلری، مذکور کیشیلر بیلن بیرگه پارتلاوچی ماده و پارتلش هجوملریگه ایش آلینهدیگن اسکونهلرنی قولگه کیریتگن.
حقانی ترماغی کابل و باشقه شهرلرده قانلی هجوملرنی اویوشتیریشگه عیبلنگن.
شونینگدیک، اوشبو ترماغ امیریکه قوشمه ایالتلری قاره رویخطیده آلینگن و اوشبو مملکت رسمیلری، پاکستاندن نیچه مرته مذکور ترماقگه قرشی جدی کورهشینی سورهگن.
افغانستان بیلن پاکستان سیاسی علاقهسی یمانلشیگه سبب بولگن کابل شهری شاهشهید منطقهسیده اویوشتیریلگن هجوم هم اوشبو ترماق تامانیدن ریجهلنگن ایدی.
