بوگون "پنجشنبه" جمهورلیک ریاستی ایکینچی اورین باسرلیگی نینگ مطبوعاتی دفتری، کرونا ویروسیگه قرشی کورهشیش اوچون چین مملکت نینگ بیرینچی یاردملرینی کابلگه ییتیشگنیدن خبر بیرگن.
مذکور یاردملر کرونا ویروسیگه قرشی کورهشیش اضطراری کمیته باشلیغی محمدسرور دانش تامانیدن تسلیم آلینگن.
مملکتده کرونا ویروسی چیقگنیدن سونگ، چین دولتی کرونا ویروسیگه قرشی کورهشیش خصوصیده افغانستان دولتیگه یاردم بیریشینی اعلان قیلگن ایدی.
شونینگدیک، باشقه بیرخبرگه کوره، جمهور رئیس محمداشرف غنی، کرونا ویروسیگه قرشی کورهشیش اوچون بلخ، فاریاب، سمنگان، جوزجان و سرپل ولایتلریده 160 میلیون افغانی انتقال بیریلیشی خصوصیده دستور بیرگن.
جمهورلیک ریاستی تامانیدن نشر قیلینگن اعلامیهگه ایتیلیشیچه، 50 میلیون افغانی بلخ، 50 میلیون افغانی فاریاب، 20 میلیون افغانی جوزجان، 20 میلیون افغانی سرپل و باشقه 20 میلیون افغانی سمنگان ولایتیده اختصاص بیریلگن.
جناب غنی، نیچه پیت آلدین کرونا ویروسیگه قرشی کورهشیش اوچون هرات ولایتیگه 4 یوز میلیون افغانی اجرهتگن ایدی. مذکور پول 1 آی آلدین هرات ولایتیگه انتقال بیریلگن، بیراق هرات ولایتی کینگش اعضالری نینگ ایتیشیچه، اوشبو ولایت حاکمیگه کرونا ویروسیگه قرشی کورهشیش اوچون یوباریلگن پولدن مصرف قیلیش صلاحیتی یوق دیر.
