ینگیلیکده هرات محلی مسووللری، کرونا ویروسیگه قرشی کورهشیش اوچون یوباریلگن 400 میلیون افغانیدن مصرف قیلیش خصوصیده اوشبو ولایت حاکمی نینگ صلاحیتی یوقلیگینی بیلدیریب و بیرقطار داکترلر ساغلیک تجهیزاتلر کملیگیدن خواطر بیلدیرگنلر.
شونینگدیک، بلخ ولایتی بوییچه ساغلیقنی سقلش مسووللری، ساغلیک تجهیزاتلر کملیگیدن خواطر بیلدیرگنلر.
بیراق، بوگون "پنجشنبه" ساغلیقنی سقلش وزیرلیگی نینگ مالی بولیمی باشلیغی سیدحفیظ سادات نینگ کابلده خبری بیر ییغین اوتکزیب ایتیشیچه، اوشبو وزارت 28.8 میلیون افغانی هرات و 26 میلیون افغانی بلخ ولایتیده یوبارگن، بیراق هرات محلی مسووللری 3 میلیون افغانی مصرف قیلگن و بلخ محلی مسووللری تعیین قیلینگن بودجهنی مصرف قیلیشگه موفق بولمهگن.
ساغلیقنی سقلش وزیرلیگی نینگ مالی بولیمی باشلیغی نینگ ایتیشیچه، کرونا ویروسیگه قرشی کورهشیش اوچون نیمروز ولایتیده 18 میلیون افغانی، فراه ولایتیده 14 میلیون افغانی و باشقه ولایتلردن 4 میلیون دن باشلب 11 میلیون افغانی پول یوباریلگن.
عینحالده، هرات ولایتی بوییچه ساغلیقنی سقلش ریاستی باشلیغی عبدالحکیم تمنا نینگ ایتیشیچه، ایکی کون آلدین بودجهدن مصرف قیلیش صلاحیتی یوق ایدی، بیراق جمهورلیک ریاستی نینگ ینگی فرمانی اساسیده، حاکملرنینگ صلاحیتی کوپهیگن و بو قیینچیلیک حل ایتیلگن.
شونینگدیک، هرات حاکمی سوزلاوچیسی جیلانی فرهاد نینگ ایتیشیچه، اوشبو ولایت حاکمی نینگ صلاحیتی کوپهیشی بیلن نیاز بولگن تجهیزاتلرنی ساتیب آلینیشی خصوصیده هیچقندهی قیینچیلیک قالمهگن.
