افغانستان بوییچه ساغلیقنی سقلش وزیرلیگی نینگ مسؤوللری، قندهار، نیمروز و دایکندی ولایتلریده کرونا ویروسی دن ینه 4 ایجابی واقعه رویخطگه آلینگنیدن خبر بیرگن.
بوگون «سهشنبه، 12- حمل» ساغلیقنی سقلش وزیرلیگی سوزلاوچیسی وحیدالله مایارنینگ ایتیشیچه، اوشبو وزیرلیک نینگ مرکزی سیناوگاهیده سیناودن اوتکزیلگن 60 شبههلی واقعهدن 2 تهسی قندهارده، بیرتهسی نیمروز ده و باشقه بیرتهسی دایکندی ده ایجابی تشخیص قیلینگن.
اوشبو 4 ینگی ایجابی واقعه رویخطگه آلینیشی بیلن مملکت ده ناتو تشکیلاتی نینگ تورت حربیسی شامل کرونا ویروسی گه چلینگنلرنینگ سانی 174 کیشی گه ییتیشدی. بو آرهدن 4 تهسی جان بیرگن و باشقه 5 تهسی یخشی بولگن. اوشبو ایجابی واقعهلردن 131 تهسی یالغیز هرات ولایتیده رویخطگه آلینگن.
ساغلیقنی سقلش وزیرلیگی تامانیدن بیریلگن رقملر اساسیده، هرات دن کیین کرونا ویروسی نینگ ایجابی واقعهلریدن تورت چیتایللیک حربی شامل 10 تهسی کابل ده، 5 تهسی نیمروز ده، 5 تهسی فراه ده، 4 تهسی سمنگان ده، 3 تهسی لوگر ده، 3 تهسی بلخ ده، 3 تهسی قندهار ده، 2 تهسی زابل ده، 2 تهسی دایکندی ده، 1 تهسی غزنی ده، 1 تهسی بدخشان ده، 1 کاپیسا ده، 1 تهسی بادغیس ده و 1 تهسی سرپل ده رویخطگه آلینگن.
