د کندوز ولایت کلای زال، ګل تپه، کلبات او اقتاش هغه څلور ولسوالۍ دي، چې وسله وال طالبان په کې حاکم دي.
دغه ولایت د هېواد په شمال او شمال ختیځ کې تر ټولو ناامنه ولایت دي، چې ټولټال ۹ ولسوالۍ لري.
د دې ولسوالیو خلک وايي، چې طالبانو د دغو څلورو ولسوالیو د تګ را تګ لارې تړلي دي.
دوی شکایت کوي، چې حکومت د دغو ولسوالیو د پاکولو او امنیت له پاره هېڅ ډول پلان نه لري او زیاتوي، چې خلک له سختو ستونزو سره مخ دي.
شیردل د ګل تپه ولسوالۍ استوګن دی، وايي، چې په ډېرې سختۍ سره کندوز ښار ته راغلی او له حکومته غواړي، چې ولسوالۍ یې د طالبانو له وجوده پاکه کړي.
کلبات، ګل تپه او اقتاش هغه درې ولسوالۍ دي، چې ۸ میاشتې مخکې د ولسمشر له خوا تاسیس شوې، چې له هماغه وخت راهیسې یې واک د طالبانو په لاس کې دی.
.JPG)
د کندوز ولایتي شورا غړی امرالدین ولي وايي، چې حکومت نویو جوړو شویو ولسوالیو ته پام نه کوي او دغه سیمې د طالبانو په کنترول کې دي.
د دې ولایت امنیه قوماندان محمد قسیم جنګل باغ وايي، چې د دغو نویو ایجاد شویو ولسوالیو امنیه قوماندانان او اداري مامورین د ناامنیو له امله په مرکز کې کار کوي.
د امنیه قوماندان په خبره، اردو او پولیس به ډېر ژر د دې ولسوالیو د پاکولو له پاره عملیات پیل کړي.
جنګل باغ وايي، د کلای زال ولسوالۍ د بېرته نیولو له پاره هم عملیات روان دي او ډېر ژر به امنیتي ځواکونه د دې ولسوالۍ واک تر لاسه کړي.
د کندوز سیمه ییز چارواکي وايي، چې د ګل تپه له پاره ولسوال ټاکل شوی او د کلبات او اقتاش ولسوالان به هم وټاکل شي.
