د فاریاب امنیه قوماندانۍ ویاند وايي، چې وسله والو طالبانو ددغه ولایت په پښتون کوټ ولسوالۍ کې د ماشومانو په ګډون ۲۹ کسان له ځان سره بیولي، چې له دې ډلې یې څلور هغه په ډزو وژلي دي.
د فاریاب ولایت امنیتي مسوولین وايي، چې وسله وال طالبان غواړي له دغو ملکي کسانو غچ واخلي.
د فاریاب امنیه قوماندانۍ ویاند عبدالکریم یورش سلام وطندار ته وویل، جدي هڅې روانې دي چې د پښتون کوټ ولسوالۍ د قومي مشرانو په منځګړیتوب دغه ۲۵ ملکي وګړي له طالبانو بېرته را خوشې کړی شي.
د فاریاب امنیتي چارواکو پروینا، د دغه ولایت په پښتون کوټ ولسوالۍ کې له شنبې ورځې راهیسې د طالبانو او ولسي پاڅون کوونکو ترمنځ وسله واله نښته روانه ده.
په همدې حال کې د فاریاب ولایتي شورا رییس محمد طاهر رحماني سلام وطندارته وویل، وروسته له هغې چې په ګلیم باف سیمه کې د ملا خنجر په نوم یو قوماندان له خپلو۷ کسانو سره ووژل شو، دې ډلې پر غچ اخیستو لاس پورې کړ.
د ولایتي شورا دغه غړی دعوه کوي، چې طالبانو د پښتون کوټ ولسوالۍ له ګلیم باف سیمې نږدې ۶۰ کسان یرغمل کړي.
طالبانو د ملکي وګړو وژنې او یرغمل نیونې په اړه تراوسه څه نه دي ویلي.
د فاریاب ولایتي شورا یو شمیر غړو خبرداری ورکړی، چې که د پښتون کوټ ولسوالۍ ګلیم باف سیمې ته سیمه ییز او حکومتي چارواکي جدي پام و نه کړي په دغه ولایت کې به ملکي وګړو او پاڅون کوونکو ته درنه مرګ ژوبله واوړي.
خو د فاریاب امنیتي چارواکي وايي، چې د ورځې تر پایه له مرکز میمنې به مرستندویه ځواکونه ور واستول شي.
