بېجینګ د سترې اقتصادي پروژې "یو کمربند یوه لار" ترسرلیک لاندې د ورېښمو لار غونډې کوربه و؛ په دې غونډه کې د افغانستان په استازيتوب د سوداګرۍ وزیر همایون رسا ګډون کړی دی.
د چینايي رسنیو په حواله د "یو کمربند یوه لار" پروژې په پرانیست غونډه کې د چین ولسمشر شي جینګ پینګ وویل، دا پروژه په اقتصادي او ترانزیټي برخه خورا مهمه او نړۍ په ګټه ده.
د افغانستان د سوداګرۍ او صنایعو خونې چارواکي د "یو کمربند یوه لار" پروژې د طرحې عملي کول د افغانستان د اقتصادي ودې له پاره ګټوره بولي.
د سوداګرۍ او صنایعو خونې ویاند صیام الدین پسرلي سلام وطندار ته وویل، د دې پروژې په عملي کولو هېواد ته د سوداګرۍ او ترانزیت په برخه کې ښه فرصتونه برابريږي؛ دغه راز د منځنۍ او سویلي اسیا هېوادونه له اروپايي او غربي هېوادونه نښلوي.
د نوموړي په خبره دغه پروژه د چین له خوا عملي کېږي او د نړۍ له ۲۰ زیات هېوادونه په دې پروژه کې ونډه لري.
د سوداګرۍ او صنایعو خونې ویاند وايي، دغه غونډه دوه ورځې دوام کوي، چې له ۱۱۰ د زیاتو هېوادونو مشران او وزیران ورغلي دي.
دوی وايي، د دې پروژې په عملي کولو سره د هېواد د سوداګریزو توکو د صادراتو او وارداتو په بیو کې کموالي راځي او دا توکي به په کم وخت کې نورو هېوادونو ته صادریږي.
