د کندهار ولایت د صنعت کارانو ټولنې مشر باريداد صادق وايي، چې په دې وروستیو کې د برېښنا پرچاوي له امله ۱۰۵ فابریکې په دې ولایت کې تړل شوي دي.
نوموړي وویل، تړل شویو فابریکو د ودانیو توکي او ځینې نور خوراکي مواد تولیدول.
د صادق پر وینا، که د برېښنا پرچاوي نوره هم اوږده شي، نو پاتې ۲۰ فابریکې به هم ډېر ژر وتړل شي.
باریداد صادق وویل، د کندهار صنعتي پارک ته ټولټال ۸ میګاواټه برېښنا ورکول شوې، چې له تېرو څو اونیو راهیسې په بشپړ ډول غوڅه شوې.
صادق وايي، د دغو فابریکو له تړلو سره سم ۲زره کاریګرو خپلې دندې له لاسه ورکړي دي،
د کندهار ولایتي شورا هم وايي، د صنعتي پارک فابریکو په تړل کېدو خبر دي او زیاتوي، چې دا ډول ناسم حالت د اقتصاد په برخه کې د افغانستان پر ځان بسیاینه زیانمنوي.
د ولایتي شورا مرستیال عبدالقیوم وايي، چې د کندهار ولایت صنعتي پارک ته د نورو ولایتونو په شان اسانتیاوې برابرې شوي نه دي او دغه ډول چلند پر پانګې ناسم اغیز لري.
خو د کندهار د برېښنا ریاست مسوولین بیا وايي، صنعتي پارک به هېڅکله سقوط ته پرې نږدي.
د دغه ریاست سوداګریز مرستیال امان الله ایوب فاروقي سلام وطندار ته وویل، د کندهار پر صنعتي پارک د برېښنا پارچاوي د احمدشاهي واټ رغېدو په لار کې د برېښنا پایو د ځایونو بدلېدو او د جنراتورونو د سون توکو د کمښت له امله رامنځته شوې.
فاروقي زیاتوي، چې ډېر ژر به د کندهار صنعتي پارک برېښنا ورغوي.
د کندهار صنعت کاران وايي، د صنعتي پارک له پاره د برېښنا او نور اسانتیاوو برابرولو په برخه کې بېغوري کېږي او له همدې امله ډېرو سوداګرو خپلې شتمنۍ نورو ولایتونو او بهرنیو هېوادونو ته ولېږدولې.
