د کلیو پراختیا او بیارغونې وزیر نصیر احمد دوراني نن د (جولای، ۸مه) کابل کې له یو شمېر خصوصي شرکتونو سره د ۳۷۹ میلیونو اشاریه ۹ افغانیو په ارزښت د ۴۵ پراختیايي پروژو تړونونه لاسلیک کړل.
دوراني وویل، دغه پروژې د هېواد په ۱۸ولایتونو بدخشان،بادغیس، بغلان، بلخ، غور، هرات، کندهار، کونړ، خوست، کندوز، ننګرهار، پکتیا، سمنګان، سرپل، زابل، کاپیسا، وردګ او دایکندي کې عملي کېږي.
د ښاغلي دوراني په وینا، د دغو پروژو د کار په پیل سره ۱۹ زره ۳۳۰ کاري ورځې جوړیږي او د سیمې ۱۳۲ زره او ۴۴۸ کورنۍ په مستقیم ډول ترې ګټه پورته کوي.
د کلیو، پراختیا او بیارغونې وزیر زیاته کړه، د اوبو مدیریت، د کرنې وده او مرکز ته د کروندګرو د کرنیزو حاصلاتو لېږد کې اسانتیاوي د دغو پروژو اساسي موخې دي.
د دې وزارت د مسوولینو په خبره، د ۴۱ پروژو بودیجه د وزارت او د دوو پروژو بودیجه د هند له مرستو او نورې يې د قزاقستان له مرستو څخه تمویلیږي.
