په پام کې ده، چې د ميدان وردګو ولایت په مېدان ښار کې به په ۵ جريبو ځمکه کې د ۲،۷ میليونو ډالرو په ارزښت يو کتابتون جوړ شي.
دغه کتابتون به د یو کال په موده کې ورغول شي.
دغه کتابتون به په عصري او معلوماتي وسایلو سمبال او ۳۰ زره دیني اسلامي، ادبي، عصري او معلوماتي کتابونه به د مطالعې له پاره ولري.
د میدان وردګو ولایت د اطلاعاتو او کلتور رییس اورنګ مختار د جهاني له قوله وایي، چې په پام ده یو شمېر ولسوالیو ته هم د دغه کتابتون څانګې وغځوي، ترڅو د میدان وردګو ځوانان د مطالعې بشپړ موادو ته لاس رسی پیداکړي.
د میدان وردګو والي حیات الله حیات هم په وردګو ولایت کې د عامه کتابتون جوړول یوه اړتیا وبلله او زیاته یې کړه، چې اوسمهال په دغه ولایت کې لسګونه چاپيزې او غږیزې رسنۍ د اقتصادي ستونزو له کبله په ټپه درېدلې دي.
مختار له کورنیو او نړیوالو موسسو څخه غوښتنه وکړه، چې د میدان وردګو ولایت غږیزو او چاپیزو رسنیو سره مرسته وکړي.
دغه نوی کتابتون په داسې حال کې جوړیږي، چې په مرکز میدانښار کې د افغانستان د کلیو پراختیا او بیا رغونې وزارت یو شمېر فرهنګي موسسو پر مټ یو ستر کتابتون جوړ شوی و، خو د یو ځانمرګي بريد له امله په بشپړ ډول ویجاړ شو.
