په هلمند ولایت کې د ګروندګرو د عایداتو د زیاتوالي او د شاتو د ښه تولید له پاره نندارتون پرانېستل شو.
دغه نندارتون د پنجشنبې په ورځ د ( ډېسمبر په ۲مه) نېټه په لښکرګا ښارپه بست خصوصي پوهنتون کې د کارډيف موسېسې په مرسته پرانيستل، چې په هلمند کې یې یو شمېر وګړو ته د شاتو مچۍ ورکړې وې؛ پرانیستل شوی دی.
د دې موسېسې مسولان وايي، چې د شاتو مچیو په یو کال کې ۱۳ زره کیلو ګرامه شات تولید کړي دي.
په دې ولايت کې د کارډيف ځايي مسول بریالی هلمند وايي، چې موخه يې د دې نندارتون له پرانیستلو څخه دا ده، چې هغو شاتو ته د بازارموندنې په برخه کې وده ورکړي، چې د دې ولايت د ګرشک، ناوې او نادعلي ولسواليو د کروندګرو او فارم لرونکو له خوا توليد شوي دي.
د ده پر وینا، چې د يو کال په موده کې په یادو ولسوالیو کې یې د مچیو شاوخوا ۷۵۰ صندوقه وېشلي دي، چې په دې موده کې يې ۱۳ زره کیلوګرامه شات تولید کړي.
پر همدې وخت د بست خصوصي پوهنتون یو استاد محمد هاشم نوراني وايي، چې موخه يې له دې نندارتون څخه د هلمند د کروندګرو محصولاتو ته بازارموندنه او وده ورکول دي.
په ورته وخت کې د هلمند د کرنې ځای ناستی ریيس شکرالله شاکري وايي، چې هلمند د مچيو د فارمونود روزنې له پاره هغه ولایت دی، چې مچۍ هم د تعداد هم د تولیداتو له مخې نسبت نورو سیمو ته په دې ځای کې د پام وړ زياتوالی کولی شي.
د ده پر خبره، دوی کولی شي، چې د شاتو مچیو ته د ښه موقعیت له مخې د شاتو له مچیو نه په یو کال کې درې ځله شات واخلي. شاکري وايي، هڅې یې روانې دي، چې په دې برخه کې نور ګروندګر هم وهڅوي.
