د هرات ولایت ځايي چارواکي وايي، چې ناپېژانده وسله والو د «هلوټرست» ماین پاکولو موسسې ۱۵ کارکوونکي د دغه ولایت د کهسان ولسوالۍ په «شبش» سیمه کې تښتولي دي.
د هرات والي مطبوعاتي مسوول جیلاني فرهاد وايي، چې د دې موسسې کاروونکي تېره ورځ (جمعه) مازدیګر د موسسې له څلورو موټرو سره تښتول شوي دي.
فرهاد وايي، چې د تښتونکو هویت او د یرغمل لامل یې معلوم نه دی او زیاتوي، چې په دې اړه د امنیتي بنسټونو څېړنې روانې دي.
د هرات ولایت امنیې قوماندانۍ ویاند عبدالروف احمدي وايي، چې د پېښې سیمې ته د پولیسو او کشفي بنسټونو مسوولین ورغلي دي او خپلې پلټنې یې پیل کړي دي.
احمدي وايي، چې دوی خپله هڅه کوي، د تښتونکو له منګولو د «هلوټرست» موسسې کارکوونکي وژغوري.
له دې مخکې د راپورونو پربنسټ څو ځلې وسله والو طالبانو د ماین پاکولو د بېلابېلو موسسو کارکوونکي تښتولي وو.
په تېر کې هم د «هلوټرست» موسسې کارکوونکي د وسله والو طالبانو او نورو ناپېژناندو وسله والو ډلو له لوري تښتول شوي وو.
درې کاله مخکې د دې موسسې ۶۳ تنه کارکوونکي د هرات په پشتون کوټ ولسوالۍ کې او ۸ تنه کارکوونکي یې دوه کاله پخوا د لوګر په پل علم سیمه کې تښتول شوي وو.
