په افغانستان کې د ملګرو ملتونو د مرکزي زون د بشري حقونو د څانګې مسوله دارمندا جوشي وایي دوی د شاوخوا ۷ سوو اړېکو نیولو په ترڅ کې معلومات راټول کړي، چې د ۲۰۱۳ کال په پرتله په ۲۰۱۴ کال کې د ملکي وګړو د مرګ ژوبلې په کچه کې ۵۳ سلنه کموالی راغلی و.
جوشي زیاته کړه، په میدان وردګو ولایت کې په ۲۰۱۴ کال کې د ۶۴ ماشومانو او ۲۴ مېرمنو په ګډون ۱۹۵ ملکي وګړو ته مرګ ژوبله اوښتي وه .
جوشي وايي، یاده مرګ ژوبله د ۱۲۶ بېلابېلو پېښو په ترڅ کې رامنځته شوې، چې له دغې شمېرې څخه ۷۰ تنه وژل شوي او ۱۲۵ نور ټپیان شوي دي .
د نوموړي د معلوماتو له مخې په دغه مرګ ژوبله کې ۹۴ د وسله والو مخالفینو،۵۱ د امنیتي منسوبینو او ۲۷ تنه نور د جګړو پر مهال د نامعلومو لوریو له خوا زیانمن شوي دي.
د میدان وردګو ولایت سرپرست والي ښاغلي عبدالمجید خوږیاڼي د ملکي وګړیو د مرګ ژوبلې د شمېر په کچه کې د کموالي له امله خوښي وښوده، خو ویې ویل، چې هیڅکله د ملکي وګړيو مرګ ژوبله د زغملو وړ نده.
ده ټولو امنیتي ارګانونو ته لارښوونه وکړه، چې ۲۰۱۵ میلادي کال کې په پوره توګه هڅه وکړي، چې د ملکي وګړیو د مرګ ژوبلې کچه صفر سلنې ته راټیټه کړي .
د میدان وردګ ولایت ویاند عطاء الله خوګیاني سلام وطندار ته وویل، چې د امنیتي مسولیتونو لېږد، د وسله والو مخالفینو کمزوري کېدل او د استوګنو په ځایونو کې د جنګ ختمېدل د دې لامل شوي دي، چې د ملکي وګړیو د مرګ ژوبلې فیصدي راکمه شي.
