د فراه ولایت د امنیې قوماندانۍ ویاند اقبال باهر وايي د دې ولایت په بکوا ولسوالۍ کې بهرنیو ځواکونو د نشهيي توکیو یوه کارخانه چې له زرو کیلوګرامه زیات نشهيي توکي په کې وو ویجاړه کړي ده چې په دغو ګوزارونو کې ۸ طالبان هم وژل شوي دي.
د ښاغلي باهر په خبره، د دغو هوايي بریدونو په دوام د ملي اردو ځانګړو ځواکونو او بهرنیو ځانګړو ځواکونو د فراه خاک سفید ولسوالۍ په سرخ دېوار کلي کې هوايي او ځمکني بریدونه کړي؛ چې پایله کې یې د طالبانو درې نظامي مرکزونه او یو روغتیايي مرکز ویجاړ شوي او ۱۰ تنه شکمن یې هم نیولي دي.
د فراه د پولیسو ویاند وايي، د همدغو عملیاتو په دوام د فراه په پشت رود ولسوالۍ کې ۸ طالبان وژل شوي او څو کړۍ ماینونه هم له منځه وړل شوي دي.
د فراه امنیتي چارواکي وايي دغه چاڼیز عملیات لا هم دوام لري.
طالبانو تراوسه په دې اړه رسنیو ته څه نه دي ویلي.
