په افغانستان کې د ملګرو ملتو مرستندویه دفتر یا یوناما یوې خپرپاڼې د۲۰۱۶ کال ملکي مرګ ژوبلې په اړه رپوټ خپور کړی، چې وایي: د ۲۰۱۶ کال له جنوري د مارچ تر ۳۱ په افغانستان کې ۶۰۰ ملکي وګړي وژل شوي او ۱۳۴۳ نور ټپیان شوي دي.
خبرپاڼه زیاتوي، چې د ۲۰۱۵ کال همدې مودې په پرتله د مړینې شمیره ۱۳ سلنه کموالی ښیي خو د ټپیانو شمیره بیا ۱۱ سلنه زیاته شوی.
راپور زیاتوي، د ملکي مرګ ژوبلې د ۶۰ سلنې عاملین د دولت وسله وال مخالفین، د ۱۹ سلنې دولتي ځواکونه، ۱۶ سلنه د ښکېلو خواوو ترمنځ جګړې له امله چې نسبت یې کوم ځانګړي لوري ته نه شي کیدی رامنځته شوې ده.
خبرپاڼه لیکي پاتې ۶ سلنه مرګ ژوبله د ناچاودو توکو چاودنې له امله دي.
یوناما د ځانمرګو او پیچلو ډله ییزو بریدونو له اړخه د ۲۶ سلنې ملکي وګړو مرګ ژوبلې زیاتوالي په اړه اندېښنه ښیي.
یوناما پر طالبانو غږ کوي چې د ملکي موخو له پیچلو ځانمرګو بریدونو لاس واخلي او د نړیوالو بشري قوانینو له مخې ملکي وګړو ته تعریف ولري.
یوناما له ټولو ښکیلو لورو غوښتي چې د ملګي مرګ ژوبلې مخنیوي په لار کې لا نورې هڅې هم وکړي.
په همدې حال کې بیا د لوګرولایت چارواکي وایي، چې د تیر کال په پرتله سږ کال په دغه ولایت کې د ملکي وګړو مرګ ژوبلې کچه ۳۰ سلنه راټيټه شوې.
د لوګر د والي ویاند سلیم صالح خبریالانو ته وویل: په ۱۳۹۳ کال کې په لوګر کې د جګړو له امله د مرګ ژوبلې شمیره ۳۵۰ تنو ته رسیده، خو په ۱۳۹۴ کال کې دا شمیره ۲۵۰ تنو ته راټيته شوې ده.
صالح زیاتوي د دې ملکي مرګ ژوبلې ۷۰ سلنې مسوولیت د وسله والو طالبانو پر غاړه دی او د ۳۰ سلنې د ملامتیا ګوته افغان ځواکونوته نیول کيږي.
د لوګر د ولایتي شورا ریس سید قریب الله سادات هم د چارواکو دغه ادعا تاییدوي خو پر ښکیلو غاړو غږکوي، چې د جنګ جګړو پرمهال د ملکې وګړو ژوند ته ډیر پاملرنه وکړي.
