طالبانو د بغلان ولایت په هغو سیمو کې چې د دوی تر کنټرول لاندې دي، خلکو ته خبرداری ورکړی، چې وروسته له دې باید د خپلو عدليي او قضايي ستونزو د حلولو له پاره د دوی جوړ شوي کمېسیون ته مراجعه وکړي.
د بغلان ولایتي شورا غړی بسم الله عطاش سلام وطندار ته وویل، چې وسله والو طالبانو د مرکزي بغلان ولسوالۍ خلکو ته خبرداری ورکړی، چې که د خپلو ستونزو د حل په برخه کې دولتي بنسټونو ته ورشي؛ سخته سزا به ورکړي.
بسم الله عطاش وویل، وسله والو طالبانو د مرکزي بغلان په خلکو سربېره د قند فابریکې د سیمو اوسېدونکیو، د ډنډغوري، تاله او برفک ولسوالیو د ځېنو سیمو خلکو ته هم خبرداری ورکړی دی.
دی وايي، چې په دغو سیمو کې د حکومت نه شتوالی د دې لامل شوی، چې طالبان هلته هر څه وغواړي؛ په خلکو یې پلي کړي.
د بغلان امنیې قوماندانۍ ویاند ذبیح الله شجاع سره له دې، چې د مرکزي بغلان ولسوالۍ د خلکو ستونزې مني، خو وايي، چې امنیتي ځواکونه د د سیمې د پاکولو له پاره د سترو چاڼیزو عملیاتو پلان لري.
ذبیح الله وايي، امنیتي ځواکونه د حکومت له واکه وتلو سیمو د بیا نیولو له پاره دغه عملیات کوي.
د پولیسو ویاند وايي، چې ډېر ژر به د مرکزي بغلان اوسېدونکیو ستونزې حل کړي.
د راپورنو له مخې، وسله والو طالبانو له دې مخکې هم د مرکزي بغلان، ډنډغوري او د برکه ولسوالۍ د تنګي مورچ په سیمه کې څو ځلې د غلا، قتل او له کوره د تېښې په تور ولسي خلک په صحرايي محاکمو کې وژلي دي او سزا یې ورکړې ده.
طالبانو همدا ډول تر خپلواک لاندې سیمو کې په خلکو د عشر او زکات ټولو قوانین هم پلي کړي دي.
