نور: که حکمتیار پرته له کوم امتیازه سوله کوي موږ يې ملاتړ کوو

د بلخ سرپرست والي عطامحمد نور وايي، که د حزب اسلامي ګوند مشر ګلبدین حکمتیار له ترهګرو سره خپلې اړيکې پرې کړي، د افغانستان اساسي قانون ومني او له کوم امتیاز غوښتلو پرته له افغان حکومت سره سوله وکړي، نو هرکلی به ورته ووايي.

نوموړي نن دوشنبه (می ۹مه) په افغانستان کې د ناټو عمومي قوماندان "جان مک نکلسون" سره د یوې ګډې خبري ناستې په ترڅ کې زیاته کړه، دی تل د هغو کسانو هرکلی کړی، چې له جنګه لاس اخلي او د سولې له پروسې سره يوځای کيږي.  

نوموړي د وروستیو اعدامونو په هکله وویل، چې د سولې عالي شورا پخواني مشر استاد برهان الدین رباني د وژونکي اعدامولو قضیه لږه مرموزه ده؛ ځکه پر وینا يې د استاد رباني د ترورعاملان اوس هم ژوندي ګرځي.

هغه زیاته کړه، چې ولې تر اوسه هغه کسان نه دي نيول شوي، چې دغو ترهګرو ته يې په خپل کور کې ځای ورکړی و.

د بلخ سرپرست والي دا هم وویل، مخکې له دې چې د برهان الدین رباني د وژنې عاملان اعدام شوي وای باید د جمعیت حزب د لوړ پوړو چارواکو په ځانګړي توګه د هغه د مشر زوی صلاح الدین رباني سره مشوره شوي وای.

د جمعیت اسلامي ګوند له لوري په خپره شوې اعلامیه کې راغلي، چې که د سولې عالي شورا پخواني مشر استاد رباني د قتل عاملین و نه نیول شي، نو د هېواد امنیت به له دې هم خراب شي.

د یادولو وړ ده، چې تېره ورځ حکومت د لومړي ځل له پاره هغه ۶ تنه يې په دار وځړول، چې په ترهګریزو بريدونو کې يې لاس درلودل.

داسې راپورونه هم خپاره شول، چې په دغو کسانو کې د استاد رباني، د ملي امنیت پخواني لوړ پوړي چارواکي عبدالله لغماني او د ملي امنیت شورا پخواني مرستیال قاتلین هم شامل و.