د عامې روغتیا وزارت پر کورونا ویروس د ۱۰ اخته کسانو د بېرته روغېدو خبر ورکوي.
د عامې روغتیا وزارت ویاند وحید مایار وايي، تر اوسه د هېواد په ۶ ولایتونو کې پر کورونا ۱۰ اخته کسان بېرته روغ او له روغتونه رخصت شوي دي.
د نوموړي په وینا، ۵ کسان په هرات، ۱ په کندهار، ۱ په نیمروز، ۱ په کاپیسا، ۱ په دایکندي او ۱ بل هم په سمنګان ولایت کې روغ شوی دی.
وحیدالله مایار په ورته مهال په هېواد کې پر کورونا د اخته کسانو د ډېرېدو خبر هم ورکوي.
هغه وايي، په تېرو ۲۴ ساعتونو کې په کابل او هرات کې د کورونا د تشخیص په مرکزونو کې ۱۸۵ شکمنې پېښې کتل شوي چې له ډلې یې یوازې ۲۲ مثبتې دي.
د عامې روغتیا د معلوماتو له مخې، ۱۲ تازه مثبتې پېښې په هرات، ۶ په کابل، ۱ په فراه او ۳ نورې په غزني، بغلان او پکتیکا ولایتونو کې ثبت شوي او کابل له هرات وروسته دویم ولایت دی چې پر کورونا د اخته کسانو ډېرې پېښې لري.
د هرات والي عبدالقیوم رحیمي هم په دغه ولایت کې پر کورونا د اخته کسانو د ډېرېدو خبرداری ورکړی او له خلکو یې غوښتي چې د امکان تر بریده په کورونو کې پاتې شي.
