وسله والو طالبانو تېره شپه د هلمند ولایت د واشير ولسوالۍ سربېره د مارجې ولسوالۍ پر تریخ ناور سيمه هم بريدونه وکړل.
دولتي ځواکونه وايي، چې د دې بريدونو مخه يې نيولې او وسله وال يې په شاه کړي دي.
په داسې حال کې، چې له تېرو څلورو ورځو راهیسې په مارجې ولسوالۍ کې وسله والو طالبانو يواځې د امنيې قومندانۍ او ولسوالۍ ودانۍ د دولتي ځواکونو په واک کې پرې اېښي او پرې بريدونه کوي او نورې ټولې سيمې يې د دې ولسوالۍ تر خپلې ولکې لاندې راوستي.
زموږ خبريال صفت الله زاهدي د پېښې سيمې تللی او وايي، پر لویه لاره ويره خپره وه، ټول امنيتي ځواکونه په امنيتي پوستو کې ځای پرځای وو، د ځواکونو په څېرو کې د جګړې پوره چمتو والی ليدل کېدل او خلک هم په موټرو کې د کډو بارولو په حال کې وو.
د ۲۱۵ میوند قول اردو قومندان تورن جنرال محمد معین فقيري وايي، چې دوی د ټولو امنيتي ځواکونو سره کلکه همغږي لري، ترڅو په دې ولایت کې د وسله والو طالبانو پټن ځایونه له منځه یوسي.
هغه وايي، دوی به هڅه وکړي چې د دې ولایت په باباجي، مارجې او شمالي ولسوالیو کې د هوايي ځواک سربېره له توپچي او پياده ځواکونو نه د سيمې امن کولو له پاره کار واخلي.
اخوا په ولسي جرګه کې د هلمند د خلکو استازی جبارقهرمان وايي، چې دوی به هڅه وکړي د هلمند د وګړو ستونزې له ولسمشر سره شريکې کړي.
د ویلو ده، چې د مارجې ولسوالۍ پراخې دښتې د هلمند په هغو سيمو کې شمېرل کيږي، چې د دوو ګاونډيو هېوادونو پاکستان او ایران څخه وسله وال طالبان کولی شي په ازاده توګه تګ را تګ وکړي.
