د پروان ولایت امنیه قوماندان جنرال محمدزمان مموزي سلام وطندار ته وویل، چې دغه چاودنه نن سهار ۵ بجې په بګرام کې دننه د امریکايي ځواکونو یو خوړنځای ته نږدې شوې ده. د ده په خبره په دې پېښه کې ۳ تنه وژل شوي او ۱۲ تنه ټپیان شوي دي.
تر اوسه د وژل شویو او ټپي شویو وګړیو د هویت په اړه کره معلومات نه شته.
د بګرام ولسوال عبدالشکور قدوس هم د پېښې پخلی کوي؛ خو د پېښې د څرنګوالي په اړه څه نه وايي.
د قدوس په خبره، د بګرام دننه ساحې ته د چاودېدونکیو توکیو انتقالول سخت دي. د ده په خبره «کېدای شي دا چاودنه دننه د ازمایښتي موادو د ازمېښت پر وخت شوې وي.»
د غوڅ ملاتړ ماموریت ځواکونه پېښه تاییدوي. د دوی له خوا نه په یوه خپره شوې خبرپاڼه کې ویل شوي، چې ټپیان یې درملنې ته لېږدول شوي او د پېښې د څرنګوالي په اړه پلټنې روانې دي.
