د افغانستان فوټبال فدراسیون هڅې پیل کړي، ترڅو د جاپان فوټبال ملي لوبډلې خلاف د نړېوالې لوبې چمتووالي له پاره دوستانه سیالیو چمتو کولو له پاره لاره هواره کړي.
د افغانستان فوټبال فدراسیون روزونکي ډلې له افغان فوټبال فدراسیون څخه په رسمي توګه غوښتي، چې له فیلیپین او تایلینډ سره دوستانه سیالۍ برابرې کړي.
د روسیې په کوربتوب ۲۰۱۸ ز کال فوټبال نړېوال جام سیالیو ته د لارې موندنې په موخه به افغانستان د راتلونکې سبټمبر میاشتې په ۸ مه نیټه د ایران په کوربتوب له جاپان فوټبال ملي لوبډلې سره نړېواله لوبه ترسره کړي.
ویل کیږي، چې د جاپان خلاف مهمې سیالۍ ته افغانستان د راتلونکې اګست میاشتې په ۳۰ مه نیټه له فلیپین سره او د سپټمبر میاشتې په ۳ مه نیټه له تایلینډۍ فوټبال ملي لوبډلې سره ددې هېواد په پلازمینه بنکاک کې د دوستانه سیالۍ کولو چانس لري.
د یادونې وړ ده، چې د افغانستان او مالیزیا فوټبال ملي لوبډلو ترمنځ هم د دوستانه سیالۍ وړاندیز شوې وو، خو د مالیزیا لوبډله به د اګست په ۲۹ مه نیټه د بنګله دیشۍ فوټبال ملي لوبډلې کوربه وي او د سپټمبر په ۳ مه نیټه به خپله د ټاکنیز پړاو نړېواله لوبه ولري، چې دافغانستان سره یې د دوستانه سیالۍ کوم چانس نه لیدل کیږي.
دغه راز ویل کیږي، چې افغانستان به د روان کال په اکتوبر میاشت کې د فوټبال نړېوال جام په ټاکنیز پړاو لوبو کې د سنګاپور او سوریه فوټبال ملي لوبډلو میلمه وي او د فیلیپین او تایلینډ فوټبال ملي لوبډلو سره ددوستانه سیالیو برابرول هم د افغانستان راتلونکو سیالیو ته ډیره ګټه لرلی شي.
د یادونې وړ ده، چې د روسیې په کوربتوب ۲۰۱۸ ز کال فوټبال نړېوال جام سیالیو ته د لارې موندنې په موخه افغانستان د اسیا په ټاکنیزپړاو لوبو کې اوسمهال د ۲ لوبو وروسته په خپل پنځم (A) ګروپ کې درېیم مقام لري.
