د هندوستان کرکټ بورډ له خوا د راتلونکې ۲۰۱۶ م کال اسیایي کرکټ جام (ایشیا کپ) سیالیو مهال وېش اعلان شو، چې د پاکستان د لومړي پړاو سوداګریزو (سوپرلیګ) شل اوریز کرکټ سیالیو سره په ټکر کی دی.
د هندوستان کرکټ بورډ سکرتر جنرال انوارګ ټاکر هندي رسنیو سره په خبرو کې ویلي دي، چي د راتلونکې کال لومړي پړاو شل اوریزه ایشیا کپ سیالۍ به د۲۰۱۶ م کال فیبرورۍ میاشتې په منځ کې وشي.
تر اوسه د دې سیالیو د کوربه هېواد اعلان نه دی شوی، خو ښایي په بنګله دېش او یا هم په هندوستان کې وشي.
د راتلونکې ایشیا کپ سیالیو د نېټې اعلان وروسته له هغې کېږي، چې د پاکستان کرکټ بورډ له کلونو انتظار وروسته د خپل لومړي پړاو سوداګریزو شل اوریزه کرکټ سیالیو (سوپرلیګ) له پاره د فیبرورۍ میاشتې ۴مه نېټه اعلان کړی ده، چې تر ۲۴مې نېټې به په عربي اماراتو کې وشي.
پاکستاني رسنیو ویلي دي، چې هندوستاني کرکټ بورډ دغه اعلان د پاکستان کرکټ د بربادۍ له پاره کړی دی او که همداسې وشي؛ نو نه به د پاکستان کرکټ ملي لوبډله په راتلونکې شل اوریز ایشیا کپ سیالیو کې د لوبېدلو چانس ولري او نه به هم د بنګله دېش او سریلانکا مخکښه ملي کرکټران د پاکستان په لومړي پړاو (سوپرلیګ) شل اوریزه کرکټ سیالیو کې لوبې ترسره کړي.
دغه راز نه یواځې د پاکستانۍ لوبډلې او سریلانکایي او بنګله دېشي لوبغاړو ستونزې به را ولاړی شي، ترڅنګ به یې ستونزمنه وي، چې تلویزونونه هم د پاکستان شل اوریزه کرکټ سیالیو خپرېدو ته زړه ښه کړي.
دغه راز پاکستانې کرکټ بورډ په هیڅ صورت کې د هندوستان په وړاندې انکار نه شي کولای، ځکه پاکستان نه غواړي، چې هندوستان د پاکستان په لومړي پړاو (سوپرلیګ) سیالیو کې خپل د (اي پی ایل) سیالیو مخکښه کرکټران له لوبېدلو څخه ایسار کړي.
که څه هم د ایشیا کپ په پرتله به نړیوال کرکټران د پاکستان په سوپرلیګ سیالیو کی ډېرې پیسی ترلاسه کړي، خو نه غواړي، چې په دې کار هندوستان خپه کړي.
