په دې وروستیو کې یو شمیر وزیرانو، رییسانو او د حکومتي ادارو یو شمیر کارکوونکي، چې له خپلو دندو استعفاوې کړي او یا د استعفا ورکولو په حال کې دي له خپلو دندو د پرېښودو سره جوخت دولتي رازونه هم افشا کوي.
له څو میاشتو راهیسې د کورنیو چارو وزیر نورالحق علومي، د ملي امنیت عمومي رییس رحمت الله نبیل، د کانونو او پطرولیم وزیر داودشاه صبا او د ټاکنو خپلواک کمیسیون رییس احمد یوسف نورستاني له خپلو دندو استعفاوې ورکړي.
د کورنیو چارو پخواني وزیر له استعفا وروسته ویلي و، چې د دندې پرمهال د یو شمیر مشرانو تر فشار لاندې و.
له علومي وروسته، د ملي امنیت پخواني رییس رحمت الله نبیل د پاکستان په اړه د افغان حکومت پر سیاست نیوکه وکړه.
په دې اړه د پوهني وزارت پخواني معین صدیق پتمن سلام وطندارته وویل، چې حکومتي چارواکي د ملي یووالي حکومت مشرانو فشارونو له امله ګوښه کیږي او د حکومت تشه روښانه کوي.
پتمن زیاته کړه، افشا ګري د هیواد په ګټه ده.
خو د ولسي جرګې غړی محمد عارف رحماني، د اړینو واکونو نه لرل او له دولتي مامورینو سره د حکومتي مشرانو مشرانو نه همکاري د یو شمیر وزیرانو او ریسانو د استعفا لاملونه بولي.
له دې ټولو سره سره مدني فعال عبدالودود پدرام، په هیواد کې پر نا روښانه حکومتوالي د نيوکې ترڅنګ وايي، چې ټیمي بحثونو د حکومتي کارکوونکو د ادارو رازونه افشا کړي.
د حکومتي چارواکو ګوښه کیدل او د منتقدینو ډلې سره یو ځای کیدل د حامد کرزي له واکمني راهیسې دود شوی او اوسمهال د ملي یووالي حکومت له جوړیدو سره له ګوښه کیدو وروسته نیوکه پر یو حکومتي فرهنګ بدله شوې ده.
