له ارګ سره د جمعیت ګوند هوکړې ته له رسېدو وروسته محمد اسحاق رهګذر د بلخ والي په توګه وګومارل شو. د نوي والي پېژندو په غونډه کې د ولسمشر د دفتر رییس عبدالسلام رحیمي، د جمعیت ګونډ مرستیال او سلګونو چارواکیو، ګوندي او قومي مشرانو ګډون کړی و.
د بلخ لېرې شوي والي عطامحمد نور د رهګذر پېژندو په غونډه کې وویل، له ارګ سره د جمعیت ګوند د خبرواترو او د ولس ګټو ته په کتو پرېکړه وشوه محمد اسحاق رهګذر د والي او جنرال اکرم سامع د امنیې قوماندان په توګه معرفي شي.
نور وايي، دغه درې میاشتېنۍ لانجې د شخصي ګټو لهپاره نه، بلکې د ولس ګټو په موخه وې. نوموړي هغو ته چې وايي نه باید عطامحمد نور له خپل دریځ او د ولایت له څوکۍ تېر شوی وی، وویل، دوی هغه څه چې حق یې دی له ارګ سره هوکړې ته پرې رسېدلي دي.
نور زیاتوي، له دې وروسته د افغانستان ژغورنې اېتلاف چارې پراخوي او په راتلونکیو ټاکنو کې پراخ حضور یې سیاسي پروګرام دی.
د بلخ نویو چارواکیو د پېژندنې په غونډه کې د ولسمشر د دفتر رییس عبدالسلام رحیمي شوې هوکړه بریا وګڼله او ټینګار وکړ چې ټول افغانان سره یو موټی واوسي.
شاوخوا درې میاشتې مخکې عطامحمد نور د ولسمشر لهخوا د ده، د استعفالیک له منلو او انجینیر داود د بلخ والي په توګه ټاکل کېدو سره مخالفت وښود. له دې وروسته د ارګ او جمعیت ترمنځ لانجه زیاته شوه او د ستونزې حل لهپاره د ارګ او جمعیت لهخوا جوړه شوې ډله بلخ ته ولاړله او بلاخره د لانجې پرحل یې هوکړه وشوه.
دغهراز یوې معتبرې سرچینې سلاموطندار سره په مرکه کې ویلي و چې د ارګ او جمعیت ترمنځ شوې هوکړې پر اساس نجیب فهیم له طبیعي پېښو سره د مبارزې وزیر، میرویس بلخي د پوهنې وزیر او فرهاد عظیمي د قزاقستان د سفیر په توګه د جمعیت لهخوا ارګ ته وړاندیز شوي دي.
محمد اسحاق رهګذر د انتقالي حکومت پرمهال په لومړیو دوو کلونو کې د بلخ والي په توګه پاتې شوی او وروسته په بېلابېلو دورو کې په ولسي جرګه د بلخ خلکو استازتوب یې کړی دی. رهګذر د جمعیت ګوند د رهبري شورا غړی هم دی.
