لویه څارنوالي وايي، چې د ښار جوړونې وزارت د فساد په قضیه کې ۲۰ نور لوړپوړي چارواکي هم تر پوښتنو ګروېږنو لاندې دي.
د لوی څارنوالۍ ویاند بصيرعزیزي نن ( سه شنبه) په کابل کې یوې خبري غونډې ته وویل، چې د ښار جوړونې وزارت د ۶ تورنو کارکوونکو د دوسیو څېړلو پرمهال روښانه شوې، چې په دې وزارت کې میلیونونه ډالر او افغانۍ تري تم شوي.
له دې وړاندې د ښار جوړونې وزارت د ۶ کار کوونکو دندې د ولسمشر د حکم په اساس وځنډول شوې او د پښتنو او پلټنو له پاره قضايي ارګانونو ته ورمعریفي شول.
اوس لوی څارنوالۍ ددې وزارت د فساد په دوسیه کې له نوي اړخونو پرده پورته کړې او ددې ترڅنګ چې د میلېونو ډالرو د تری تم کېدو خبر ورکوي، دا هم زیاتوي چې په دې قضیه کې پر ۲۰ نورو لوړ پوړو کار کوونکو هم د فساد شکونه شته، چې تر څارنې لاندې نیول شوي او پوښتنې ترې روانې دي.
عزیزي رسنيو سره په خبرو کې زیاته کړه چې د ښار جوړونې وزارت د فساد په قضیه کې ۶ تورنو لوړ پوړو کار کوونکو دوسیې بشپړې شوي او له محاکمو یې غوښتنه وکړله، چې په اړه یې د عدالت پر اساس پرېکړه وکړي.
د لوی څارنوالۍ د ویاند په وینا، دکابل بانک د فساد له قضيې وروسته د ښار جوړونې وزارت د ۶ لوړ پوړو چارواکو قضيه د فساد له سترو دوسیو څخه ده.
افغان ولسمشر اشرف غني د ښار جوړونې وزارت د ۶ کار کوونکو د دندو ځنډولو ترڅنګ ددې وزارت اړوندې ساختماني پروژې، په خپلوانو او لوړپوړو چارواکو د اپارتمانونو د ویش لړۍ او د بې کیفیته مېنو جوړولو د کار بند حکم هم وکړ.
تېره اونۍ د لوی څارنوالۍ چارواکو سلام وطندار ته ویلي و، چې د روانې اونۍ شنبې په ورځ به ددې قضیې اړوند دوسیې قضايي ارګانونو ته ولیږي خو اوس وايي چې دا چاره به راتلونکې اونۍ کې ترسره شي.
لویه څارنوالي د فساد په دوسیه کې پېچلتیا او پراخوالی د دې چارې د ځند د لامل په توګه یادوي.
