ولسي جرګې د ټاکنیز بنسټ د واکونو او جوړښت په اړه د ولسمشر تقنیني فرمان د ۱۲۶ مخالفو رایو او ۲۷ تاییدو رایو په کارولو دغه فرمان ردکړ.
دا دویم ځل دی، چې په ټاکنیزو بنسټونو کې د سمون په اړه ولسمشر تقنیني فرمان د ولسي جرګې له لوري ردیږي.
نن (دوشنبه) د ولسي جرګې غونډه د فرمان د رد او تایید په اړه له لانجو ډکه وه.
د ولسي جرګې هغه شمېر غړي، چې د ولسمشر د فرمان د تایید پلوي وو، وايي، چې د ټاکنیز بنسټ د واکونو، دندو او جوړښت په اړه د ولسمشر فرمان ردول هېواد له ستونزو سره مخامخ کوي.
د جرګې غړی فرهاد عظیمي وايي، د ولسي جرګې هغو وکیلانو چې د ولسمشر فرمان رد کړ، هغوی د فرمان له منځپانګې خبر نه وو او زیاتوي، چې دغه وکیلان د نامعلومې کړۍ له خوا دې کار ته هڅول شوي وو.
دی وايي، چې د فرمان ردول د حکومت او ولسي جرګې د بدنامۍ سبب ده او د خلکو اندېښنې زیاتوي.
عظیمي وویل، د دې فرمان تاییدول د خلکو غوښتنه وه، خو ځېنو وکیلانو د خلکو غوښتنه په څپېړه ووهله.
په ورته وخت کې هغه شمېر وکیلان چې دغه فرمان یې رد کړ، وايي، چې د ولسمشر فرما د ټاکنیزو واکونو او جوړښت په اړه د اساسي قانون خلاف و.
په دې اړه عبدالقادر ځاځی وايي، چې د فرمان په تایید سره د حکومت مشرانو غوښتل، چې د ټاکنو کمېسیون ۵۰ ـ ۵۰ په خپلو کې ووېشي.
دی وايي، ولسي جرګې د دې فرمان په رد سره هغو کسانو ته غاښ ماتوونکی ځواب ورکړ، چې غوښتل یې کمېسیون شخصي کړي.
له بل لوري د ولسمشر ویاند محمد هارون چخانسوري په خبري غونډه کې د فرمان د ردولو په اړه وویل، چې حکومت د ولسي جرګې او ولسوالیو شوراګانو د ټاکنو د پيل له پاره خپل ټول تلاش کوي.
ده ټینګار وکړ، چې حکومت به له حقوقي بنسټونو سره له سلا وروسته د ټاکنیز بنسټ د سمون له پاره کار پیلوي.
په ټاکنیز نظام کې سمون راوستل د ولسمشر غني او اجرایوي رییس عبدالله عبدالله تر منځ د لاسلیک شوې سیاسي هوکړې مهه ماده وه؛ چې تر اوسه پورې دوی په دې نه دي توانېدلي، چې په ټاکنیز بنسټ کې سمون راولي.
