ولسي جرګې نن په عمومي غونډې کې له خپلواکو ادارو او تقنیني سندونو د «خپلواک» کلمې لرې کولو په تړاو د ولسمشر تقنیني فرمان رایې ورکولو ته وړاندې کړ.
د ولسي جرګې تقنین کمېسیون دغه فرمان د اساسي قانون مادو خلاف بولي. د دغه کمېسیون غړي قاضي نذیراحمد حنفي د ټاکنیزو شکایتونو خپلواکۍ ته په اشارې سره وايي چې له بنسټونو د خپلواک کلمې لرې کول به لکه د ټاکنیزو شکایتونو خپلواک کمېسیون د دغو واحدونو خپلواکي تر پوښتنې لاندې یوسي.
د ښاغلي حنفي په وینا، ولسمشر داسې مهال له خپلواکو ادارو د خپلواکې کلمې لرې کولو فرمان صادر کړ چې خپله يې د مسلکي زدهکړیو انسټیټوټ خپلواک کړ او پوهنې وزارت يې په دوو برخو ووېشلو.
د ولسمشر فرمان د تایید یا رد په اړه د خبرو اترو پر مهال ۷ کمېسیونونو دغه فرمان ته د رد رایه ورکړه او ۳ نورو تایید کړ.
هغه وکیلان چې د ولسمشر دغه فرمان تایید غوښتونکي وو؛ وايي چې یو شمیر بنسټونو له خپلواکې کلمې ناوړه استفاده کړې او هېڅ بنسټ ته ځواب ویونکي نهدي.
لهدې ټولو سره ـ سره د وکیلانو له بحث وروسته د ولسي جرګې رییس عبدالروف ابراهیمي له خپلواکو ادارو او تقنیني سندونو د خپلواک کلمې په تړاو د ولسمشر تقنیني فرمان رایې ورکولو ته وړاندې کړ چې د ۳۵ مثبتو او نورو منفي رایو په اخېستلو سره رد شو.
د ولسي جرګې ځېنې وکیلان باوي دي چې ولسمشر د ورته شان فرمانونو په صادرولو سره باید د قانون جوړونې په برخه د ولسي جرګې واکونه محدود نهکړي او په بدل کې يې د تعدیلي طرحې په وړاندې کولو د یو بنسټ خپلواکي یا ناخپلواکي اصلاح کړي.
