ولسي جرګې د نن ورځي په عمومي غونډه کې د هلمندیو پرلتوالو د سوله غوښتنې او مدني حرکته ملاتړ وکړ.
د وري میاشتې پر درېیمه نېټه د هلمند مرکز لښکرګاه ښار د غازي محمد ایوب خان لوبغالي مخې ته پر ولسي خلکو له موټربم برید وروسته ځايي ځوانانو او مدني فعالانو د برید پر ځای د سولې خېمه ودروله. د سولې دغه پرلتوال له طالبانو غواړي له جګړې لاس واخلي او افغان دولت سره د سولې خبرې پيل کړي.
د ولسي جرګې رییس عبدالروف ابراهیمي وویل، د هلمندیانو سوله غوښتنې حرکت په حقه دی او ولسي جرګه په ټولو امکاناتو ورځنې ملاتړ کوي. ابراهیمي په ټینګار وویل، افغان دولت باید د هغوی له غوښتنو ملاتړ وکړي.
ورته وخت کې نن ورځ د بلخ او زابل ولایتونو ځېنو مدني فعالانو او ځوانانو له هلمندي پرلتوالو په ملاتړ د پرلت خېمې په درولو سره له طالبانو غوښتي له بریدونه بس کړي او د سولې له بهیر سره یوځای شي.
لس ورځې کېږي چې د هلمند سوله غوښتنې او اوربند پرلت خېمې جوړې شوي. پرلتوالو د نه خوړو اعتصاب هم وکړ چې تر روغتونونو ورسېدل؛ خو د هلمند دیني عالمانو په منځګړتوب د نه خوړو اعتصاب یې پای ته ورسولو. خو هلمندي پرلتوال لا هم په خپلو غوښتنې ټینګار لري.
په دې وروستیو کې د هلمند دیني عالمانو د یوې کمېټې په جوړېدو ژمنه کړې چې د سولې په ټینګښت کې به عملي کار وکړي.
