په کابل پوهنتون کې د محصلانو ترمنځ شخړه د ولسي جرګې د یوشمېر غړیو توند غبرګون راپارولی دی.
دوی په یاد اکاډمیک مرکز او علمي چاپېریال کې دا ډول پېښې خواشینوونکې وبللې او ټینګار یې وکړ چې باید وڅېړل شي.
د ولسي جرګې غړی محمدعلي اخلاقي له لوړو زدهکړو وزارت نه وغوښتل چې په پوهنتون کې د دا ډول پېښو د مخنیوي ترڅنګ، د هغو کسانو مخه هم ونیسي چې له بهره پوهنتون ته اختلافات وروړي.
یوشمېر نور وکیلان د شخړې پرمهال پوهنتون ته د وسلو وړل د اندېښنې وړ وبلل. د ولسي جرګې غړيو نادرخان کټوازي او نسیمې نیازې وویل، د لوړو زدهکړو وزارت باید ولسي جرګې او افغانانو ته ځواب ورکړي چې چا، څه ډول او د چا په همکارۍ پوهنتون ته وسلې وړې دي؟
بلخوا د ولسي جرګې رییس عبدالرووف ابراهیمي په کابل پوهنتون کې د یوه محصل وژل کېدل او د ۱۹ نورو ټپي کېدل ناورین وباله او د جرګې له دیني، فرهنګي، پوهنې او لوړو زدهکړو له کمېسیون نه یې وغوښتل چې ژر تر ژره د لوړو زدهکړو وزیر د وضاحت او ځواب ویلو لهپاره کمېسیون ته ور وغواړي.
خو د لوړو زدهکړو وزارت ویاند فیصل امین وايي، د کابل پوهنتون په شخړه کې هېڅ محصل وژل شوی نهدی، بلکې یاد کس د رحمانبابا زدهکوونکی دی چې د دهبوري څلورلارو سره وژل شوی دی.
.jpg)
نوموړی ډاډ ورکوي چې د کابل پوهنتون د نظم او دسېپلین کمېټه به له هغو محصلانو سره قانوني چلن کوي چې په یاده پېښه کې ښکېل وو.
بلخوا د کابل پولیسو د تېرې پنجشنبې په ورځ ومنله چې محصلانو د ډوډۍ نوبت پرسر شخړه کړې او له دواړو لوریو یې ۳۵ محصلان د څېړنو لهپاره نیولي دي.
