د ولسي جرګې د نن ورځې عمومي غونډه د تېرې چهار شنبې او جمعې ورځو د پېښو څرنګوالي ته ځانګړې شوې وه؛ وکیلانو وویل، دواړه پېښې خونړۍ دي، باید د څېړلو لهپاره یې یو پلاوی وټاکل شي.
د ولسي جرګې غړي اقبال صافي وویل، د ولسي جرګې پلاوی باید د چهار شنبې ورځې د خونړۍ پېښې د څرنګوالي په اړه د امنیتي چارواکو ځوابونه ترلاسه کړي او د دې ترڅنګ دا پلاوی د جمعې د ورځې د لاریون موضوع هم وڅېړي.
صافی وايي، په لومړي سر کې لاریون سوله ییز، روا غوښتنې او نیوکې یې درلودې خو له څو ساعتونو وروسته د ښې حکومتوالۍ په چارو کې د ولسمشر پخوانۍ ځانګړی استازی احمد ضیا مسعود او د ملي امنیت پخوانی رییس امرالله صالح چې په دولت کې مهمه دنده لري؛ لاریون کوونکي د خپلو شخصي موخو لهپاره له اصلي لارې تاوتریخوالي ته راوګرځول.
نوموړي وویل، د ولسي جرګې پلاوی باید دیادو کسانو او په لاریون کې له دواړو لوریو ډزې کوونکي کسانو پیداکړي او ملامت کسان عدلي او قضایي ارګانونو ته وروپېژني.
د ولسي جرګې بل غړی حاجي الماس جاهد وویل، د چهار شنبې ورځی پېښه ډېره ستره او خونړۍ وه، خو د جمعې د ورځې پېښه ځکه ډېره مهمه ده؛ چې له لاریون څخه څو تنو سیاستوالو د خپلو ګټو په پار استفاده وکړله.
الماس جاهد وايي، د ولسي جرګې پلاوی باید دا موضوع په جدي توګه وڅېړي.
نوموړي وویل، هغو کسانو چې د عامو خلکو له پاکو احساساتو ناوړه استفاده کړې او د لاریون پرمهال د دواړو لورو ډزې کوونکي دې تشخیص او عدلي قضايي بنسټونو ته وسپارلی شي.
د ولسي جرګې په غونډه کې پرېکړه وشوه، چې د چهار شنبې او جمعې ورځو د پېښو په اړه دې ژوره څېړنه وشي او ولسي جرګه باید حکومت ته یوه هر اړخیزه طرحه وړاندې کړي او دا چې د ناامنیو د کابو کولو په اړه باید څه وشې د یک شنبې په ورځ دی هم د ولسي جرګې په ځانګړې عمومي غونډه کې یو ځل بیا په دې اړه د وکیلانو نظرونه واورېدل شي.
