افغان ولسمشر محمداشرف غني نن د پکتیا په مرکز ګردېز ښار کې د مراسمو پرمهال د پنځو سترو پروژو کار رسماً پيل کړ.
په غونډه کې د ښار جوړنې وزارت او د سيمهییزو ارګانونو خپلواکې ادارې له لوري د شهيدانو کورنیو او ښوونکیو د ښارګوټي یو سند هم لاسليک شو چې ۳ زر مستحقو کورنيو ته به په کې د کورنو نومرې ووېشل شي.
ولسمشر غني غونډې ته وویل چې له تاجيکستانه د وارداتي بريښنا پروژه بشپړه شوې او ۱۸ زرو کورونو ته په مرکز ګردېز کې په ټیټه بیه برېښنا ورکوي.
دغه راز، ولسمشر په ګردېز ښار کې د صنعتي پارک پرانېستې ترڅنګ د امنیې قوماندانۍ نوې ودانۍ د بنسټ ډبره کېښوده چې لګښت یې ۴۵ ميلیونه افغانۍ اټکل شویدی.
په ورته مهال د ګردېز ـ زرمت سړک د جوړېدو ژمنه هم وشوه. دا سړک د ۲۰ کيلو مترو په اوږدوالي او ۷ متره سور سره په دوو کلونو کې د۵۸۰ ميلونه افغانيو په لګښت بشپړېږي.
غونډې ته د پکتيا والي شميمخان کټوازي وويل، د دې سترو پروژو په ګډون به سږ کال د ۳۰ نورو لويو پروژو کار هم پيل شي.
دا په تېرو شپږو مياشتو کې درېيم ځل دی چې ولسمشر غني پکتيا ته ځي؛ خو په لومړي ځل د څوو لويو پروژو کار پرانیزي.
د چارواکیو د معلوماتو لهمخې، ولسمشرغني به دوې ورځې پکتيا کې پاتې شي او د دې ولايت بېلابېلو قشرونو سره به لېدنې کتنې وکړي.
