ولسمشر محمد اشرف غني نن په طالبانو غږ وکړ چې اوربند ته دوام ورکړي ترڅو د سولې خبرې پيل شي او له دوی يې وغوښتل چې ځان له افراطي حرکتونو بېل کړي.
نوموړي دا څرګندونې نن له غرمې مخکې د یو لړ مراسمو په ترڅ کې د وزیرمحمداکبرخان جامع جومات د امام او خطیب دوکتورمحمدایاز نیازي جنازې ته چې پرون په یوه تروریستي برید کې ووژل شو، د درناوي په مراسمو کې وکړې.
له ارګه په خپره شوې خبرپاڼه کې راغلي چې ولسمشر پر طالبانو غږ وکړ: «هغه اوربند ته چې د نېکمرغه کوچني اختر په ورځو کې د خلکو د خوښۍ لامل شو، دوام ورکړئ او ځان له افراطي حرکتونو جلا کړيئ، ترڅو ژر د سولې مذاکرات پیل شي.»
خبرپاڼه زياتوي چې جمهور ريیس غني له د دين له علماوو وغوښتل چې په افغانستان کې د سولې او ثبات د تامین لپاره په یو صف کې کار وکړي او زياته يې کړه چې سوله او د اسلام د مبین دین او اساسي قانون ارزښتونه عملي شي.
محمد اياز نيازی د کابل په وزیر محمد اکبرخان جومات کې تېر ماښام د چاودېدونکيو توکيو د چاودنې له کبله ووژل شو. په دې چاودنه کې یو بل لمونځ کوونکی هم ووژل شو او دوه نور ټپیان شول.
تر اوسه پورې هېڅ ډلې د دې پېښې مسووليت نه دی منلی.
