د اجرایه رییس دویم مرستیال محمد محقق له سلام وطندار سره په ځانګړې مرکه کې وویل، تر دې دمه د ۳۱ تښتول شویو کورنيو وضعيت ته پاملرنه، نه ده کړې.
محقق وايي، چې د امنیت شورا په ناسته کې به د ۳۱ تښتول شویو مسافرو کورنیو وضعیت ته د لاسرسي پر مسله بحث وکړي.
دا په داسې حال کې ده، چې د ۳۱ برمته شویو مسافرو د کورنیو غړي او په لسګونو مدني فعالانو د دوشنبې په ورځ (۲۰۱۵م زيږدیز/ اپرېل۶ ) د برمته شویومسافرو په اړه د عدالت غوښتنې په موخه خیمې و درولې .
هغوی وايي، تر هغه چې تښتول شوي مسافر را خلاص نه شي خپلو اعتراضونو ته به ادامه ورکړي.
د مسافرو د کورنیو یوې غړې سلام وطندارته وویل، تر اوسه دولت او نور صلاحیت لرونکي بنسټونه دوی ته ځانګړې پاملرنه نه ده کړې.
د معصومې دوه زامن، چې يو يې ۱۵ او بل يې ۳۰ کاله عمر لري د تښتول شویو کسانو په ډله کې دي.
دا وايي، یواځې همدغه دوه زامن یې د کورنۍ ګټیالي وو.
دغه میرمن زیاتوي، چې د کورنۍ اقتصادي حالات یې ډېر خراب دی او تر دې دمه یې د کومې دولتي او خصوصي موسسې له لوري ورسره مرسته هم نه ده شوې.
تر دا مهاله د یادو ۳۱ تښتول شویو مسافرو په اړه د هېواد دننه او بهر په لسګونه لاريونونه شوي، خو افغان حکومتي چارواکي تر اوسه د دغو مسافرو په اړه تازه معلومات رسنيو ته دي ورکړي.
