د ولسمشر ځای ناستي ویاند شاه حسین مرتضوي هغه اوازې رد کړې، چې له مخې يې ویل کېدل د سولې عالي شورا به د ولسمشر محمد اشرف غني لهخوا لغوه اعلان شي.
نوموړي د یکشنبې په ورځ کابل کې خبري غونډې ته وویل، چې د سولې عالي شورا به پر خپل ځای پاتې وي، ځکه پر خبره يې، سوله د حکومت له لومړیتوبونو ده، چې د سولې عالي شورا له لارې ټینګېدی شي.
د اکرم خپلواک ټاکل کېدل
شاه حسین مرتضوي دا هم وویل، چې د ولسمشر یوه فرمان پر بنسټ په سیاسي چارو کې د ولسمشر ځانګړی استازی محمد اکرم خپلواک د خپلې اوسنۍ دندې په خوندیتوب د سولې پروسې او بیا یوځای کېدنې پروګرام او همدارنګه د سولې عالي شورا دارالانشا رییس په توګه ګومارل شوی دی.
نوموړي زیاته کړه، چې د اکرم خپلواک په راتګ سره به د سولې عالي شورا بیا ژوندۍ شي.
مرتضوي وايي، چې د سولې عالي شورا لهپاره نوې ستراتيژي تدوین شوې او د دغې ستراتيژۍ د پلي کولو سره به شورا اغیزمن رول ولوبوي.
راتلونکې اوونۍ به د حزب اسلامي ځینې بندیان خوشي شي
همدارنګه مرتضوي وویل، چې د ګلبدین حکمتیار په مشرۍ حزب اسلامي سره د سولې هوکړهلیک پر اساس د یاد حزب یو شمیر بندیان هم له بنده خلاصیږي.
د مرتضوي پروینا، له حزب اسلامي سره د سولې هوکړه لیک په اړه د حکومت او دغه ګوند ترمنځ ټول مسوولیتونه، چې حکومت پورې تړاو لري تر راتلونکو ۱۵ ورځو پورې بشپړ او عملي کیږي.
هغه وویل: "له عملي پلوه د هوکړه لیک مواد د وروستي کېدو په حال کې دي او د هغې هوکړې پر اساس چې شوې د حزب اسلامي بندیانو یو برخه هم خوشې کیږي".
د مرتضوي پروینا، له حزب اسلامي سره د سولې هوکړه لیک تطبیق له پاره حکومت ټول چمتوالی نیولی او سترګې پر لار دی چې حزب اسلامي د ګلبدین حکمتیار د راتګ نېټه اعلان کړي.
د ولسمشر غني رسمي سفر
مرتضوي وویل، چې ولسمشر محمد اشرف غني د اقتصادي او تجارتي اړیکو د پراختیا په موخه اندونیزیا، اسټرالیا او سینګاپور ته سفر کړی دی.
هغه زیاته کړه، چې غني به د یاد هېوادونو له لوړ پوړو چارواکو سره لیدنه وکړي.
د دې ترڅنګ به ولسمشر، د ټرانزیټي، کانونو استخراج، ظرفیت لوړونې، لوړې زدهکړې او کرنې پراختیا په اړه هم د یادو هېوادونو له بېلابېلو لوړ پوړو مقاماتو سره خبرې اترې ولري.
