وسله وال طالبان غواړي د خلکو غږ خاموشه کړي

ځينې کارپوهان او مدني فعالان وايي، چې د وسله والو طالبانو له لوري د یو خصوصي ټلویزیون پر کارکوونکي ځانمرګی برید د دې ښکارندويي کوي، چې دغه ډله هڅه کوي د خلکو غږ خاموشه کړي.

تېره ورځ وسله والو طالبانو د طلوع ټلویزیون او کابورا پروډکشن پر حملې موټرځانمرګی برید وکړ، چې د راپورونو له مخې په دغه برید کې د طلوع ټلویزیون ۶ کارکوونکي ووژل شول او ۲۷ نور عام وګړي ټپيان شول.

د رسنيو دغه فعالان وايي، چې د طالبانو دغه برید پر انسانیت برید و او له دې ښکاري، چې دغه ډله پر انسانیت باور نه لري.

د ولسي جرګې غړې شکریې بارکزۍ وویل، چې وسله وال طالبان غواړي په دا شان بريدونو سره د افغانستان د رسنيو غږ خاموشه کړي.

نوموړې زیاته کړه، چې د دغو بریدونو د ترسره کولو وروسته په افغانستان کې به د بیان د ازادۍ هيڅ غږ ته هم صدمه و نه رسیږي او له پخوا به لا هم تیز او رسا شي.

شکريې له حکومته غوښتنه وکړه، چې پر رسنيو د بريدونو مخه ونیسي کنه په راتلونکي کې به ژورنالیستان د زیاتو ستونزو سره مخ شي.

ځينې خبریالان هم له حکومت څخه غوښتنه کوي، چې باید په جدي ډول د دغو بریدونو مخه ونیسي.

دوی خبرداری ورکوي، چې که د طالبانو له لوري پر دوی د بریدونو مخه و نه نيول شي، نو په راتلونکي کې به د خبريالۍ په کار ناوړه اغیزه وکړي.

د سياسي چارو کارپوه احمد سعيدي، چې څو ورځې وړاندې د ناپيژانده وسله والو له خوا د یو برید له امله ټپی شوی وو وايي، وسله والو طالبانو په خپلو برنامو کې ځينې بدلولونه راوستي او غواړي د يوې بلې لارې پر رسنيو فشار راوړي.

سعيدي د طلوع ټلویزیون پر کارکوونکو برید د حکومت بې کفايتي او ناغيړي ګڼي.

هغه زیاتوي، چې حکومت مخکې له مخکې له دغو پېښو خبر وي، خو د مخنيوي له پاره یې هڅې نه کوي.

د افغانستان د ازادو رسنيو (نی) د څار کمېسیون مشر صدیق الله توحيدي د طلوع ټلویزیون پر کارکوونکو د برید غندلو ترڅنګ وايي، چې غواړي د طالبانو پر وړاندې د رسنيو له هر ډول پرېکړې ملاتړ وکړي.