په عام محضر کې د یوې مېرمنې او سړي سنګسار

د بغلان ولایت د ښځو چارو رییسه خدیجه یقین وايي، چې تېره ورځ ( پنج شنبه) یو سیمه ییز مشر خپله مېرمن له یو بل کلیوال کس سره د نامشروع اړیکو په تور لومړۍ په کاڼو وویشته او وروسته یې په ډزو سره ووژله.

سنګسار شوي د بغلان د، ده صلاح ولسوالۍ د سنګبران کلي اوسېدونکي دي.

د دغو دوه تنو د سنګسارولو پر مهال د کلي او مالت زیات خلک را ټول شوي وو او په عام محضر کې سنګسار کړل.

د بغلان ولایت د ښځو چارو رییسه وايي، چې دغه مېرمن د تیلیفون په وسیله یو کس سره اړیکه لرله او ټاکل شوې وه، چې تېښته ور سره وکړي.

د سنګبران کلي پولیس د دغه مشر د نیولو له پاره کار پیل کړی دی.

څو ورځې مخکې دې ته ورته په یوه بله پېښه کې یوه پیغله مېرمن د خپل مېړه له خوا د ترښځې په ګوزار سره وژل شوې وه.

همدا ډول میاشت مخکې هم د دغه ولایت د خنجان په ولسوالۍ کې یو کس خپله مېرمن د ټولو خلکو په مخ کې په ډزو ووژله.

دا په داسې حال کې ده، چې له دې مخکې د بغلان ولایت د ښځو چارو ریاست په دې ولایت کې د ښځو په وړاندې د تاوتریخوالي په کچه کې د ۲۶ سلنې کموالي خبر وکړي و.