د کورنیو چارو وزارت ویاند طارق ارین وايي، د عاشورا مراسمو لپاره جدي امنیتي تدابیر نیول شوي او زياتوي د امنیتي ځواکونو او ولسي امنیتي ځواک ترمنځ اړینه همغږي رامنځته شوې ترڅو د محرم د لسمې ورځې مراسم په خوندي فضا کې جوړ شي.
نوموړی وايي، که څه هم ترهګر هڅه کوي د بریدونو په ترسره کولو د خلکو ژوند له ګواښ سره مخ کړي، خو امنیتي ځواکونه د دغو بریدونو د مخنیوي لپاره لاس په کار شوي دي.
له دې یوه اوونۍ وړاندې د دیني مراسمو د امنیتي همغږۍ د عالي کمیسیون سرپرست محمد اسلم شیوا په یوه خبري غونډه کې ویلي و چې ۴۰۰۰ امنیتي ځواکونه او ۱۰۰۰۰ ولسي ځواکونه به د عاشورا مراسمو امنیت ساتل پرغاړه ولري.
د کابل یو شمېر ښاریان د دغو مراسمو لپاره د لا جدي او ټینګو امنیتي تدابیرو غوښتنه کوي. خلک وايي، که څه هم په لوړه کچه امنیتي ګواښونه شته، خو امنیتي ځواکونه باید له ولسي ځواک سره مل د دغو ګواښونو د مخنیوي تضمین وکړي.
د ولسمشر دویم مرستیال محمد سرور دانش وړاندې خبرداری ورکړی و چې د عاشورا پر مراسمو له بل هر وخت ډېر د بریدونو خطر جدي دی او خلک باید د امنیت د ټینګښت لپاره له امنیتي ځواکونو سره همکاري وکړي.
د امنیتي وضعیت په اړه اندېښنې او د کورونا ویروس له خپرېدو وېره هغه اصلي لاملونه دي چې ویل کېږي له کبله به یې سږ کال د عاشورا په مراسمو کې د خلکو ګدون کم وي.
