د لوګر ولایتي چارواکو سلام وطندار ته وویل، چې نن د (اګست په ۲۴مه) سهار شاوخوا پنځه بجې د دولت د وسله والو مخالفینو له خوا په څرخ ولسوالۍ کې د شاه خلوتي مشهور زیارت په بمونو والوزول شو.
د لوګر د والي ویاند محمد سلیم صالحي وویل، چې د شاه خلوتي زیارت ۵۰۰ کاله مخینه لري.
د صالحي پر وینا د لوګر، میدان وردګو، غزني، پکتیا او کابل ځېنې سیدان د شاه خلوتي اولاده ګڼل کېږي.
شاوخوا یوه میاشت مخکې هم د میدان وردګو ولایت په تنګي سیمه کې د سوبیانو په نوم مشهور زیارت وسله والو طالبانو سوزولی و.
که څه هم د اسلامي دولت غړو تر اوسه یې په عرب مېشتو ځایونو کې ډېر تاریخي ځایونه او زیارتونوه الوزولي دي، خو د دې دواړو پېښو د مسولیت په اړه رسنیو ته تر اوسه نه دوی او نه هم کومې بلې ډلې څه دي ویلي دي.
