چارواکي وایي د میدان وردګو ولایت په نرخ ولسوالۍ کې یوه شل کلنه مېرمن د خپل خاوند له لوري ووژل شوه.
د دغه ولایت د والي ویاند عطاالله خوږیاڼي د (سپټمبر په ۳مه) سلام وطندار ته وویل، چې دغه پېښه نن ماښام نېږدې ۶ بجې د نرخ ولسوالۍ په اول خېلو سیمه کې رامنځته شوې ده.
نوموړی زیاته کړه، چې وژل شوې مېرمن شکیلا نومېږي. د خوږياڼي په خبره، لومړني معلومات ښيي، چې د خپل خاوند نورالرحمن له لوري زندۍ شوې او وژل شوې ده.
د ده پر وینا، د یادې پېښې په اړه امنیتي ځواکونو د نورالرحمن د نیولو هڅې پیل کړي او همدا راز د پېښې د څېړنې له پاره سیمې ته امنیتي ځواکونه رسېدلي دي.
د دغه ولایت د ښځو چارو رئیسې وحیدې ښکلې پژواک ته وویل د شکیلا خاوند تر پېښې وروسته له سیمې څخه تښتېدلی، خو امنیتي ځواکونو یې لا تر دې دمه د نیولو هیڅ هڅه نه ده کړې.
تردې وړاندې هم په یاده سیمه کې یوه ښوونکې د خپل ورور له لورې د دندې د ترسره کولو له امله په ډزو سره ټپي کړې وه او په همدې اونۍ کې یو ملا هم په بغلان کې خپله ښځه هم وژلې وه.
