دفاع وزارت: که د فساد مخنیوي کې پاتې راشو؛ بهرنۍ مرستې بندیږي

د ملي دفاع وزارت مسوولین وايي، که فساد سره جدي مبارزه ونه شي؛ مرستندویه هېوادونه خپلې مرستې بندوي.

د ملي دفاع وزارت تخنیکي او لوجستکي مرستیال غلام سخي احمدزي په خبري غونډه کې وویل، د فساد مخنیوي له‌پاره یې په دغه وزارت کې ځينې پروګرامونه پلي کړي دي.

د احمدزي په خبره، که دوی په ملي دفاع وزارت کې د فساد په مخنیوي کې پاتې راشي؛ مرستندویه هېوادونه به پوځ سره خپلې مرستې بندې کړي.

د دې وزارت تخنیکي او لوجستیکي مرستیال وايي، په وروستیو شپږو میاشتو کې یوزرو او ۶۶۵ منسوبین، چې په خپلو پوستونو کې یې له ۳ کلونو زیاته دنده ترسره کړې وه، تبدیل کړي دي.

احمدزی وايي، د تبدیل شویو منسوبینو له شمېره ۹۶۶ هغه یې د اکمالاتو او تدارکاتو برخې منسوبین دي.

د ملي دفاع وزار تخنیکي او لوجستیکي مرستیال وايي، د خیالي سرتېرو د تثبیت له‌پاره یې د منسوبینو په ډله کې د "هرمز" په نوم د بایو متریک پروګرام پيل کړې دی، چې تراوسه ۱۰ بېلابېلې ډلې په قول اردوګانو کې د بایو متریک کولو له‌پاره ګومارل شوي دي.

دی وایي، د ملي پوځ له ۱۹۵ زرو سرتېرو څخه تراوسه ۸ زره ۳۱۸ کسان بایو متریک شوي دي.

غلام سخي احمدزی وايي، د سرتېرو یوزرو او ۵۰۰ دوسیې چې ۲ زره او ۲۴۹ سرتېرې یې په اړه د بېلابېلو جرمونو له کبله تورن دي؛ عدلي او قضايي بنسټونو ته لېږلي دي.

احمدزي وویل، تراوسه د ملي دفاع وزارت ۱۹۰ جنرالانو او ۹۰۰ منسوبینو چې د ملي دفاع وزارت په تدارکاتو او لوجستیک برخو کې دندې لري خپلې شتمنۍ ثبت کړي دي.