.jpg)
د سیمه ییزو چارواکو په وینا د بغلان ولایت د ډنډغوري زیاته سیمه تېره شپه (چهارشنبه) یو ځل بیا وسله والو طالبانو نیولې ده.
د بغلان ولایتي شورا غړی بسم الله عطاش د ډنډغوري د سقوط په اړه د دې ولایت ځايي امنیتي چارواکي ګرم بولي او وايي، چې دغه سیمه یوه میاشت مخکې د افغان امنیتي ځواکونو له لوري د طالبانو له موجودیته پاکه شوه.
دی وايي، دغو عملیاتو له مالي زیان سربېره ځاني زیان لاره او امنیتي ځواکونو قربانۍ ورکړې، خو د سیمې د ساتلو له پاره هیڅ ډول پاملرنه ونه شوه.
د ولایتي شورا دغه غړی وايي، که افغان حکومت په ډنډغوري او ډنډشهاب الدین سیمه کې د طالبانو د ځپلو له پاره پراخ هوايي او ځمکني عملیات ونه کړي، په نږدې وخت کې به د پلخمري ښار د طالبانو له لوري ونیول شي.
تر اوسه پورې د بغلان ولایت ځايي چارواکو د ډنډغوري سیمې د سقوط په اره څه نه دي ویلي.
په ورته وخت کې وسله والو طالبانو رسنیو ته په لېږل شوې خبرپاڼې کې ادعا کړې، چې دوی د ډنډغوري په نښته کې ۷ سیمه ییز پولیس وژلي او یو ټانګ یې ویجاړ کړی دی.
ډنډغوري سیمه په داسې حال کې یو ځل بیا وسله وال طالبان نیسي، چې څه وخت مخکې د پلخمري ښار د ډنډ شهاب الدین سیمه له یوې وسله والې نښتې وروسته طالبانو ونیوله.
